Messages & Sermons

Previous
Next

COVID-19 | 2020

 

UBUTUMWA BW’UMWEPISIKOPI MU GIHE CYA COVID-19 | 2020

Musenyeri Dr. GAHIMA Manasseh

Umwepisikopi wa E.A.R Diyosezi Gahini

 

 

 

[March 14, 9:16 PM]

 

Mwiriwe, natinze kubagezaho umwanzuto wafashwe mu rwego rwo gukumira Koronavirusi kubera ibyo narimo bitoroshye. Ejo nta materaniro nkuko Ubuyobozi bw’igihugu bwabisabye gusanabantu bazasengere mu ngo zabo kandi rwose bazasenge. Imana yacu ntijya inanirwa, nibi bizavaho. Mukomerere mu Mwami.

 

 

[3/20, 7:39 AM]

 

Yesu ashimwe nshuti bavandimwe,  kugirango twese tubashe kwegerana no guhana amakuru muri ibi bihe inama zihuza abantu benshi zahagaritswe, ndasaba abayobozi ba za Paruwasi bose kuba kuri uru rubuga. Nibwo bwonyine tuzabasha gukomezanya ndetse no guhanahana amakuru ku bijyanye n’umurimo. Roger amfashe kumenya abatari kuri uru rubuga kugirango tubakangurire kurujyaho cyangwa nabo bibwirize. Bizadufasha cyane. Imana ibahe umugisha.

[3/20, 4:52 AM]

 

Nifuzaga kandi ko abatari abapasitori cyangwa abayobozi ba za Paruwasi cg abarimu bakurwa kuri uru rutonde, bitabaye ibyo, Roger agashyiraho urubuga rwihariye rw’abo mvuze gusa ntabandi bariho kuko hari amakuru yihariye tujya dusangira atareba abalayiki.

 

 

 [3/21, 1:49 PM]

 

Yobu ati, ” Nzi yuko ushobora byose, kandi nta kibasha kurogoya umugambi wawe ..” Yob 42:2. Yobu yari yaramenye cyera urukundo rw’Imana, yari yaramenye ko Imana idakiranirwa na rimwe kuburyo yishingirije ku Mana ye no mu bihe bikomeye uko byari bimeze bite. Nk’umuntu wambaye umubiri, yageze mu gihe yari yirambiwe, akibaza byinshi ariko umutima we ntiwavuye ku Mana. Mu gihe gikwiye, Imana yaramushimye, ishima kuzirikana kwe, ishima uburyo yashikamye ku izina ryayo mu bihe bikomeye.

 

Nshuti benedata, ibihe turimo ntibikomeye nk’ibyo Yobu yabayemo. Reka dushikame nkuko yashikamye, kwizera kwacu tugukomeze nkuko Yobu yavuze, dushyire umwete mu kwikomereza Ku Mwami wacu. Mu gihe gikwiye kandi kitari kure, ibihe turimo bizarangira, Imana yacu izadusubiza, kandi igihugu cyacu kizahabwa umugisha. Imana ibahe umugisha mwese. Bishop Gahima.

 

[3/21, 11:09 PM]

Dr Gahima: Murare neza mu maboko ya Nyagasani kandi muzirikane ejo kuziyiriza no gusenga dusengera iki cyorezo cyamaze guhangayika benshi.

 

 

[3/22, 7:01 AM]

 

Thank you Poteli. May the Lord hear our prayers. Umuririmbyi yaravuze ngo  ” nyura mu misozi, nyura mu mataba, aho hose niko harushya umutima, njya nsaba Uwiteka kugirango amfashe, Uwiteka nawe ntatinda kunyumva”.

 

 Nshuti benedata, iki ni igihe cyo twibuka ikiguzi gikomeye Yesu yatanze kubwacu ngo tubabarirwe, byonyine bitwigishe ko iki cyorezo kitahwana no kurimbuka kw’isi yose. Uwatwitangiye ku musaraba, ariwe mutambyi wacu Yesu Kristo, aracyafite ubushobozi bwose bwo gukiza abarwaye, kurinda abatararwara kutarwara no guhagarika iki cyorezo. Mukomere, mushikame, Kristo yarazutse ari ku ngoma kandi afite ubushobozi bwose mu kiganza cye. Icyubahiro kibe icye iteka.

 

 

 [3/23, 4:31 AM]

 

 Nshuti benedata, Uwiteka ampaye umunezero pe. Hari ukuri tudakwiriye guca kuruhande. “Ni nde wadutandukanya n’urukundo rwa Kristo? Mbese ni amakuba cyangwa ni ibyago , cyangwa ni ukurenganywa, cyangwa ni inzara…..oya, ahubwo muri byose , turushishwaho kunesha n’uwadukunze”. Rom 8: 35-37.

Nshuti benedata, mu bihe nk’ibi ndabibutsa ko twagiriwe ubuntu ko dufite uwo twegamiraho. Umuririmbyi ati, uwo njya nikomezaho, ntawundi ni Kristo…(Ind 361).Reka dushikame mu kwizera kwacu, turusheho kwegera cyane Imana yacu tuyibwire byose tudatinya, kandi dukomeze kwiyeza nukuri.

Nkuko dukangurirwa gukaraba mu rwego rwo kwirinda icyorezo cya Koronavirus, no mu mwuka dukomeze  kwiyeza kugirango umwanzi Satani atitwaza ibi bihe n’ibibazo byabaho ngo agushe benshi.

Twikomereze k’Uwiteka cyane kuruta uko twabikoraga. Iri niryo banga ry’ubutsinzi kuko naho twananirwa, we ntajya ananirwa. Icyubahiro kibe icye ibihe byose. Mugire umunsi mwiza.

 

 

[3/24, 11:08 AM]

 

Nshuti benedata, ibihe turimo so bishya imbere y’Imana. Ibi byahabuwe cyera gusa abatubanjirije Imana yishimiraga, no abagendaga neza my bihe bikomeye. Kuri abo, Imana yasezeranaga isezerano ridakuka. Mureke natwe tugerageze. Amagambo Imana impaye muri iki gitondo tuyasangire. Yes 33:15- 16. “Ugendana  gukiranuka  akavuga ibitunganye, akagaya indamu iva mu gahato, agashwishuriza impongano bamuha, akipfuka mu matwi ngo atumva inama yo kuvusha amaraso, agahumiriza ngo atareba ibibi, uwo niwe uzatura aharengeye, yikingire igihome cyo ku rutare, azahabwa ibyokurya bimutunga, n’amazi yo kunywa ntazayabura”.

Imana yaradukunze, yaratwiyeretse, yadusogongeje ibyiza, ikiruta byose yaduhaye Yesu kutubera impongano y’ibyaha byacu. Mureke twizere ko impamvu yatumye Imana idukorera ibyo  byose kwari ukugirango twinjire mw’isezerano ryo kuba Abana b’Imana tugahabwa ubugingo buhoraho. Mushikame rero, twiyeze, dushake mu maso y’Imana, izaduhisha aka kaga ndetse izanadukiriza igihugu. Imana ibahe umugisha

 

[3/24, 12:15 PM]

Benedata, ibi nibibe ibihe byo gusenga Atari ukohererezanya inkuru z’urucantege. Nta bihe Ibiza bitabayeho, ariko icyo Imana idushakaho ni ukuba hafi yayo, kwihana ibyaha no gusenga. Abantu b’Imana barahumurizanya.

 

 

[3/25, 6:18 AM]

 

Mwaramutse nshuti benedata bakundwa,  ijambo Imana impaye muri ikigitondo turisangire. Ibyakozwe 1: 6-7. ” Nuko bamaze guterana, baramubaza bati, mbese Mwami, iki nicyo gihe wenda kugaruriramo ubwami mu bisirayeli? Arabasubiza ati, si ibyanyu kumenya iby’iminsi cyangwa ibihe Data yagennye..”.irindi jambo nsomye ni : Gut :29:28 “ibihishwe ni iby’Uwiteka Imana yacu ariko ibyahishuwe ni ibyacu n’urubyaro rwacu kugirango twumvire amagambo yose y’amategeko y’Imana.

Nshuti benedata, Kristo Yesu ubwe yarivugiye ati “data azenda Ku byange abibahe”… Yavugaga umwuka Wera. Twagiriwe Ubuntu bwo kuba Abana b’Imana. Yaduhaye umwuka Wera ho ingwate ngo mu bihe nk’ibi, atuyobore ntidutwarwe n’imiraba. Ntidukwiye kureba ibyo Abana b’isi bafitiye ubwoba ngo natwe dutinye, ahubwo dusabe Imana ngo tuyoborwe n’umwuka wera cyane kugirango aduhishurire uburyo tugomba kwifata mu bihe nk’ibi. Si ibyacu kumenya iby’ibihe, ahubwo twizere ko icyo  Imana yacu  yagambiriye kuri twe, naho isi yanyeganyega ite kizasohora. Iki ni igihe cyo kwikomereza k’Uwiteka kuruta ibindi bihe twaciyemo. Kandi Umwami wacu aduhaye umwanya uhagije nukuri. Mureke tuwukoreshe mu gusenga twiyeza ndetse dushaka ubwiru bwe mw’ijambo rye. Tuzava muri ibi bihe adutyaje, dufite imbaraga zidasanzwe.

Reka ibi bihe bibe ibyo kubakanwa na Kristo ngo tube amabuye mazima, kandi inzu y’Imana nzima yishimira. Twese naho twakora iki, ntawamenya iby’ibihe kuko na Kristo yavuze ko atabimenya bizwi na Data gusa. Icyo tuzi neza yaduhishuriye nuko turi Abana b’Imana kandi adufashe mu kuboko kwe kandi ntawe uzadukura muri uko kuboko. Dushikame rero mu kwizera kwacu, kandi tumwikomerezeho, ntacyo tuzaba. Amahoro y’Imana kuri mwese. Bishop Gahima.

[3/26, 6:23 AM]

 

Mwaramutse bakundwa cyane.  Umuririmbyi w’i ndirimbo ya 178 yaravuze ati ” iyo utewe n’amakuba akomeye, Ukiheba ubonye ko bicitse pe, jyubara imigisha yawe uko ingana, erega ni myinshi yo gutangaza”.

 

Nshuti benedata, umugisha usumba Indi yose utagurwa n’amafaranga cg ikindi cyose, ni ukumenywa n’Imana, ugakundwa nayo, ukaba ikoramutima y’ Imana. Amagambo Imana yabwiye ab’Israeli muri Yesaya 43: 4-5a.abe ayacu uyu munsi mw’Izina rya Yesu. ” Kuko wambereye inkoramutima kandi ukaba uwo kubahwa nange nkagukunda, nicyo kizatuma ntanga ingabo zigapfa ku bwawe. Ntutinye, ndi kumwe nawe.. “. Iri ni isezerano ku bakunda Imana bose bakizera Umwana wayo Yesu, bakagendera mu nzira ye batunganye. Abo nibo baguma mu buntu bwe, bakarindirwa mu rwihisho rw’isumba byose  Aba Imana yasezeranye ko bazahora mu gicucu cy’ishobora byose-Zab 91:1. Imana nyiribyiringiro ibuzuze umunezero wose n’amahoro biheshwa no kwizera , kugirango murusheho kwiringira mubiheshejwe n’imbaraga z’umwuka wera – Abaroma 15:13. Amen. Bishop Gahima.

 

 

[3/27, 5:31 AM]

 

Mwaramutse nshuti z’Imana, Paul ati, “mujye mwishimira mu mwami wacu iminsi yose, Yewe nongeye kubivuga nti nimwishime, ineza yanyu imenywe n’abantu bose, Umwami wacu ari bugufi. Ntimukagire icyo mwiganyira, ahubwo ibyo mushaka byose bimenywe n’Imana, mubisabiye, mubyingiye, mushima. Nuko amahoro y’Imana ahebuje rwose, ayo umuntu yamenya azarindire imitima yanyu n’ibyo mwibwira muri Kristo Yesu”. Abafilipi 4:4-7.

 

Iyi minsi, Imana irankomeje cyane kandi ndabasengera namwe mwese n’Itorero muri rusange ngo dukomere kuko mu bihe nk’ibi, nibwo Abana n’Imana bagaragaza itandukaniro n’abatarayimenya. Nukuri Imana iduhaye umwanya wo kuba imbere yayo. Ababuzwaga umwanya n’imirimo ubu dufite umwanya uhagije mu rugo. Mureke aya mahirwe tuyabyaze umusaruro tubana n’Imana, dusengera ibiriho kandi Imana yadusezeraniye ko izumva iri mw’ijuru idukirize igihugu-2 Ngoma 7: 14. Kandi ndababwiza ukuri, izadukiriza igihugu ariko inadukirize ubugingo, umuntu ku giti cye n’umuryango we.

 

Icya kabiri, mureke mu bihe nk’ibi, ineza yacu imenywe n’abantu bose. Ibi nibyo bihe byo guhumuriza abantu b’Imana ndetse no kubagaragariza urukundo ndetse no gutinyuka kubwira abifite ngo bafashe abatishoboye. Mu rukundo n’ineza, abantu bose bazafashanya kandi Imana izabiduhera umugisha. Imana nyiramahoro ibahe umugisha kandi ikomeze kububaka kurufatiro rutajegajega. Mugire umunsi mwiza.Bishop Gahima.

 

 

[3/28, 5:26 AM]

 

Mwaramutse benedata,Yesu ashimwe cyane,  Imana impaye iyi ndirimbo ngo tuyiririmbane uyu munsi wose tuyitekerazaho kandi itubereye isengesho: Ni Indirimbo ya 373 mu GUSHIMISHA. 

 

1. Harihw’icyo nkwaka Mwami , Nubwo mpora ngucumuraho; Mwam’ unyeze unyejeshe, Amazi cyangw’umuriro.

 

Gusubiramo: 

Mpanagurwe hose, Mwami, 

N’umuriro nib’ushaka, Nkir’ibyaha birimburwe; Nkir’ibyaha birimburwe

 

2. N’ untunganiriz’ ubgenge, Nzanezerwa, nzaguhimbaza, Arik’umutima wera, Ndawushaka kurutaho
3. Ninezw’umutima wanjye, Ni bgo nzunguk’ubgenge bgose, Bgo mw’ijuru, bgo mw’ijuru,Mwami mbubwirijwe na We

 

4. Ngerageza uko nshobora Kwibuz’ inama mbi z’ibyaha, Nyamara njya mbyibonamo,Jy’umboneza, jy’umboneza

 

Nshuti benedata, icyo Imana yampishuriye muri Gut 28 nuko amahoro yacu, umugisha wacu, kunguka mubyo dukora, ubuzima buzira umuze, umugisha mu bana, ibihe bidahindagurika  n’ibindi, ariko igisumba ibindi, kugendana ibyiringiro by’ubugingo buhoraho biva mu kubaha Imana. Mureke tubigerageze nshuti z’Imana, mureke tubigambirire. 

 

Njya mbabwira ko nta ngaruka mbi zo gukora neza, kandi nta mwanya twaba Imbere y’Imana ngo ye kudusanga. Iyi minsi by’umwihariko itubere iyo kugerageza kubana n’Imana kuko iduhaye uwo mwanya nta rwitwazo. Hamwe no kubana n’abacu, turisheho kubana n’Imana. Niyo nshuti iruta izindi. Ndabifuriza kubana n’Imana. Amahoro itanga aruta ago mwakwibwira arinde imitima yanyu n’ubwenge bwanyu kandi Umugisha w’Imana Data Umwana n’Umwuka Wera ubane namwe mwese uyu munsi wose n’ibihe bidashira, Amen. Bishop Gahima.

 

 

[3/29, 6:10 AM]

 

Mwaramutse neza benedata,  ashimwe Yesu Umwami wacu utubereye umurengezi muri iyi si n’umutambyi wacu uhora utwingingira imbere ya Data. 

Dore ijambo Imana impaye uyu minsi, mu magambo ikomeje kunyigisha muri iyi minsi ajyanye n’ibanga ryo kwishimirwa n’Imana  Mar 12:30-31.

” Nuko rero, ukundishe Uwiteka Imana yawe umutima wawe wose n’ubugingo bwawe bwose, n’ubwenge bwawe bwose, n’imbaraga zawe zose. Irya kabiri ngiri:ukunde mugenzi wawe nkuko wikunda”. Nshuti z’Imana, gukunda Imana kwacu si ukuyibwira ko tuyikunda cyangwa guhora tubiririmba. Imana yampishuriye ko kuyikunda nyako kwacu ari ukuyiha ubugingo bwacu, kuyisumbisha ibyo dukunda, kuzirikana kwirinda ibiyibabaza tugakora n’umwete wacu ibyo tuzi biyinezeza ariko gukiranuka kwacu no kugendera imbere yayo dutunganye. Urukundo nya rukundo ntiruba mu magambo rugaragazwa n’uburyo dukora imirimo y’urukundo duhereye Ku buryo twitwara imbere y’uwadukunze mbere akatwitangira. 

Muri ibi bihe turimo, ndabasengera torero ry’Imana ngo tubivemo hari icyo Imana ikoze mu bugingo bwacu. Imana ikeneye kubona itorero ryayo ryezwa uko bwije nuko bukeye kugirango tuyoborwe n’Umwuka Wera. Uwaduhamagaye arera, natwe tugomba kuba abera. Iki nicyo mbasabira nshuti z’Imana ngo imana ibishimire, yishimire ubugingo bwanyu kandi ubugingo bwanyu burindirwe muri Kristo. Twibuke imirimo ikomeye Imana yadukoreye n’imiryango yacu ndetse n’itorero muri rusange bidutere kuyishima no kuzirikana gukora ibyo ishima. Imana ibahe amahoro uyu minsi wose kandi umugisha w’Imana Data, Umwana n’Umwuka Wera ubane namwe n’abanyu bose iteka ryose. Amen. Bishop Gahima.

 

 

[3/30, 6:00 AM]

 

Benedata bakundwa, Yesu Umwami wacu ashimwe cyane. Akomeje kuturinda no kutwitaho ari ku mubiri ari no ku bugingo, Izina rye rishimwe. Imana yaraye inyeretse ibiriho ndatangara kandi ishimwe kuko yanyigishirije mu biriho aribyo ngirango mbasangize iki gitondo. 

 

Hari twa clipe twa WhatsApp ejo nabonye tunyishisha ikintu cya ngombwa. Iya mbere yagaragazaga umugabo wagumye murugo kubera Covid19  muri iyi minsi ariko agumana irari ry’ubusambanyi, uko yegera muramu we, bimutera amakimbirane n’uwo bashakanye, intambara iba yose  babura amahoro aricyo gihe bakayagize. Iyindi, umugabo ananirwa kwihanganira kuguma mu rugo, ajya mu muhanda, akubitwa inkoni zibaho zose. Uko nabitekerezaga ndyamye indirimbo ya 62/2 yakomeje kuza. Naraye nyiririmba nsanga koko “nta mahoro yuzuye twabona muri iyi si. Ni kwa Data gusa hasendereye amahoro”.

 

Iki gitondo, ndagirango twibukiranye ko agaciro duha Imana yacu, imigambi yacu ikayinyura, nibyo biduhesha amahoro ahoraho, mu bihe byiza n’ibibi. Mu gitabo cya Daniel 1: 1-8, tubona uko abayuda batsinzwe na Nebukadizari akajyana abasore bamwe b’abahanga, bafite uburanga n’imbaraga mu bayuda ngo batozwe umuco w’abakarudaya. Mu batoranijwe, harimo Daniel wari waramenye Imana y’abayuda, waragambiriye ko mu byiza no mu bibi atazatezuka kuyubaha. Aho benshi tujya tugeragerezwa, tubonye agahenge ko kuzamurwa mu ntera, guhabwa imirimo myiza irimo amafaranga n’ibyubahiro, we na bagenzi be ntibahageragerejwe. Ku murongo wa 8 (Dan1:8) haratubwira ngo ” Maze Daniel agambirira mu mutima we ko ataziyandurisha ibyo kurya by’umwami cyangwa vino yanywaga…”. 

 

Uko kugambirira kwa Daniel na bagenzi be, byabasunikiye Ku Mana kuburyo Imana nayo yagambiriye kubarengera mu byoroheje n’ibikomeye, yereka umwami n’abatware b’Abakarudaya ko Daniel na bagenzi be ari ab’Imana. 

 

Dufite twese ubwoba bwa Corona Virus, ariko se wayigereranya n’intare zimaze iminsi zishonjeshejwe ? Wayigereranya se n’itanura ry’Umuriro ryacanishijwe n’umwami? Wayigereranya se n’ubukana bwo  kugambanirwa n’abenegihugu uri umunyamahanga? Muri ibyo byose, twigamo isomo ko isumbabyose , nyirububasha n’ubushobozi, niyo yonyine yabasha kutuneshereza. Tureke kugira ubwoba rero ahubwo dushikamye, tugaruke muri twe twibaze, ni ryari umutima wange wanyuze Imana? ni ryari nagambiriye mu bikomeye, Imana inezezwa n’umugambi wange kuriyo?. Iki nicyo gihe nshuti yange wagambirira, kandi Imana yacu ntijya irambirwa kutugirira neza no kutugaragariza ko yatwishimiye ubwo twagambiriraga kuyihesha icyubahiro. Ndasengera itorero ngo tumenye neza Imana yacu, hari igihe ibintu bibaho ukagirango Imana iracecetse irabirebera.. Oya sibyo. Imana ihora ikiranuka kandi irazirikana. Ndabasabira uwo mugisha wo kubona Imana mu buryo budasanzwe nkuko iri kandi kuyubaha kwacu nibyo bizaduhesha umugisha w’ibihe byose. Mugire umunsi w’umunezero. Bishop Gahima.

 

 

[3/31, 8:53 AM]

 

Nshuti benedata, Yesu ashimwe, iki gitondo natinze kiboherereza ubu butumwa kuko nabanje kwiga neza iby’iyi minsi turimo ngo nsobanukirwe ko amagambo nahawe koko ajyanye n’ibi bihe turimo.  Mu cyumweru nk’iki mbere yuko Yesu ajya i Yerusalemu, yabanje ahantu hitwa Kayisariya ya Filipo, ngo ahageze, abaza abigishwa be ati, “abantu bagira ngo Umwana w’umuntu ni nde? ( Mat 16: 13-19). Abigishwa ba Yesu bamubwiye ko bamwe bamwita umuhanuzi nka Eliya cyangwa Yeremiya abandi bati bakwita Yohana Umubatiza. Ababajije bo uko bamuzi, Simoni Petero aramusubiza ati ” uri Kristo, Umwana w’Imana ihoraho”. 

 

Nshuti benedata, amagambo Yesu yabwiye Petero niyo abamumenye natwe tubwirwa muri iki gitondo. 

1. Yaramubwiye ati urahirwa kuko Data ariwe uguhishuriye ibi atari umubiri n’amaraso. Ukuri nuko natwe ubwiru bw’Imana twabuhishuriwe na Data kubw’urukundo rwe gusa atari ubuhanga bwacu.
2. At “uri Petero (urutate)nange nzubaka itorero ryange kuri urwo rutare. Itorero aha turyumve nko kubaho(presence)kw’Imana muri twe cyangwa kubana n’Imana kandi ati, iryo torero nzubaka, amarembo y’ikuzimu ntazarishobora. Iri ni isezerano rikomeye ku bizeye Imana bose. Uko ibihe byaba bimeze kose, iryo sezerano ntirikuka. Hari igihe Satani yibwira ko yatunyeganyeza ariko iyo tumubwiye iri banga ko twasezeranijwe ko tutazanyeganyezwa, arahunga akadutega ikindi gihe atayobewe ko igihe cy’Imana kitabaho. Ikibazo kuri twe gusa, iyo asanze twateshutse tutacyomatanye n’Umwami wacu, yadukorera ibyo ashaka. Tube maso rero, duhore twomatanye n’imbaraga twahawe turi mw’isezerano.
3. Ati, Nzaguha imfunguzo z’ubwami bwo mw’Ijuru kandi icyo uzahambira mw’isi no mw’Ijuru kizaba gihambiriwe n’icyo uzahambura mw’isi , kizaba gihambuwe mw’Ijuru”. 

 

Nshuti z’Imana, ibi ni ubutware n’ubushobozi bidasanzwe nkuko umiririmbyi w’indirimbo ya 28/2 yaririmbye. Ubu bushobozi nibwo butuma icyo tuvuze mw’Izina rya Yesu kiba nkuko tukivuze. Nibwo butuma ducyaha Satani agahunga. Mureke no mu bihe nk’ibi twambare ubu butware, dusenge Imana yacu tudatuza kandi duhamanya n’Umwuka, icyo dusaba cyose tuzagihabwa. Imana nyiramahoro ibahe amahoro n’umugisha. Bishop Gahima.

 

 

 

 

[4/1, 3:15 AM]

 

Nshuti benedata, ndabazindukiye ariko ndasenga ngo uko mfashijwe n’Imana namwe mufashwe. Hari ukuntu Imana idutungura bidasanzwe ngo twumve neza amagambo yayo. 

 

Danieli 9:20-23:  “nuko nkivuga, nsenga natura ibyaha byange n’iby’ubwoko bwange bw’Abisirayeli, kandi ntakambira Uwiteka Imana yange kubw’Umusozi wera w’Imana yange, ngikomeje gusenga umugabo Gaburiyeli nabonaga ngitangira kwerekwa aratumwa, maze aragaruka aza ningoga igihe cyo gutamba igitambo cya nimugoroba cyendaga kugera, ankoraho. Arambwira anyigisha ati, “Danieli, ubu nzanywe no kungura ubwenge bwawe. Ugitangira kwinginga, haje ijambo kandi nzanywe no kurikubwira kuko ukundwa cyane. Nuko iryo jambo uritekereze cyane, umenye n’ibyo weretswe”.

 

Ndifuza kugaruka kuri aya magambo yo kumurongo wa 23 gusa: ‘ugitangira kwinginga haje ijambo kandi nzanywe no kurikubwira kuko ukundwa cyane’.

 

Nshuti benedata, mu butumwa mperutse kuboherereza nange nongeye kwibutswa nonaha, naberetse uburyo Daniel  yanyuze umutima w’Imana ubwo yahaga agaciro Imana karengeye mu gihe yakabaye yarageragejwe n’umwanya yari agezemo. Ntibyahagarariye aho. Uko Danieli yabonaga ukuboko kw’Imana, niko yacishwaga bugufi akarambarara, akibona nk’imunyabyaha. Ibyo Imana ibikunda cyane, kandi ukuri mbabwira, umunyamugisha acishwa bugufi iyo abonye ukuboko kw’Imana  kuko nibwo Imana iba Imana nyine. 

 

Muri iki gice cya 9:20-23 mbagajejeho Danieli yari amaze kubona iyerekwa ry’ibyendaga kubaho, abona uburakari bw’Imana ariko anabona gutabarwa kwa Israyeli nyuma yo kwezwa. We yasanze nta kindi yakora usibye kwinginga Imana, yatura ibyaha bye n’iby’ubwoko bwe bw’ab’Isirayeli. Ngo kwinginga kwe kwageze ku Mana. (musome igice cya 8 n’icya 9 nibwo mubibona neza), yihanaga ibyaha bye n’iby’ubwoko bw’ab’Isirayeli, ibyo bari baragomeye Imana byose yabyishyizeho, arasenga amenetse umutima, Imana yishimira gusenga kwe imutumaho Malayika, kandi imwereka uko ibihe bizakurikirana n’ibizabaho byose. 

 

Muri ibi bihe, ndabasaba ngo tugerageze twitange nk’ibitambo Kubwacu no ku gihugu cyacu ndetse n’itorero ryacu. Nukuri mureke dutakambire Imana kandi twiyeze rwose. Imana izatwumva idukirize igihugu ariko si ibyo gusa, izanaturemera ihumure ry’ubugingo budashira. Ko ibyaturangazaga cyane byagabanutse, mwaretse tukagerageza, amajoro yacu, ndetse n’aho bishoboka amasaha amwe y’amanywa,  tukayaharira Uwiteka ahari aho ko yatwumva akadutabara. Icyo mbonye nuko tudakwiye kureba icyorezo cya Covid 19 gusa nukuri, Imana inyeretse ko iyi ari integuza, nyamara ibindi byaza tubikumirishije amasengesho, byashoboka ko bitatubaho. Imana idufashe kubyumva. Sinabasha kwandika byinshi muri ubu buryo bwa WhatsApp, gusa ndasaba Imana ngo ibahishurire ibirutaho.

 

Nsoza, reka nongere nsabe abatambyi ngo twikorere umutwaro Imana yaduhaye wo gusengera itorero n’igihugu ubudasiba, kudacira abantu imanza kabone naho baba baraduhemukiye ibingana bite, ahubwo twikorere imitwaro yabo, tubasengere, twaturire Imana ibyaha byacu n’ibyabo, Imana iduhaye aya magambo, izatwumva kandi izadusubiza neza. N’abakristo mwese n’icyo mbasaba, niba twifuza ko Imana itwishimira mureke iyo ariyo iba inzira ducamo. Imana Data wa twese nyir’ ubushobozi n’ubutware, ari nawe gukiranuka kwacu, ibahe amahoro n’umugisha mw’Izina rya Yesu Kristo Umwami wacu. Amen.  Bishop Gahima.

 

 

[4/2, 4:45 AM]

 

Nshuti bavandimwe, buracyeye, Imana ikomeje kutugirira neza, irinda ubuzima bwacu ndetse n’ubugingo bwacu. Nkuko dukurikirana Ku maradiyo na TV, umubare w’abafatwa ndetse n’abahitanywa na Covid-19 ukomeje kwiyongera. Uko bukeye n’uko bwije ibi bitatugezeho bikwiye kujya bituremera amashimwe ndetse no guca bugufi kurushaho imbere y’Imana. Korali Rehoboth ya ADEPR bagira indirimbo yitwa “Ntiyaryama twashira”, ndayikunda kuko ivuga ukuri. Uwiteka atubera maso kandi ibyo yavuze muri Yesaya 43 ko azatanga ingabo zigapfa Ku bwacu biba bisohora tubireba. Izina ry’Umwami wacu rishimwe. 

 

Muri iki gitondo reka nongere Ku magambo ejo nabagejejeho. Imirongo micye y’ibyo Daniel, umugabo wakunzwe n’Imana yeretse by’igihe nk’iki. Dan 9: 24: ” ibyumweru mirongo irindwi bitegekewe ubwoko bwawe n’umurwa Wera, kugirango ibicumuro bicibwe, n’ibyaha bishire, no gukiranirwa gutangirwe impongano haze gukiranuka kw’iteka, ibyerekanywe n’ibyahanuwe bifatanishwe ikimenyetso, ahera cyane hasigwe amavuta”. 

 

Nshuti bavandimwe, ibi bihe turimo, ni ibyo gutunganywa kwacu, ndetse n’ukw’Ijuru. Hari ibitambo bizajyana n’uku gutunganywa gusa abiringiye Uwiteka yishimira ntibazabigenderamo muhumure kuko nibo barimo gutegurirwa. Imana yacu ishimwe kubimpishurira. Umugeni, uko umunsi w’ubukwe wegera, niko benshi barara amajoro, bakaruha,  ibimasa , ihene cyangwa inkoko nyinshi zikabagwa ngo ubukwe bugende neza, umugeni n’mukwe banezerwe. Muturize mu mwami rero, hari ibigomba gukurwaho kugirango Umwami wacu adutunganirize aheza hadukwiriye. Ku  Mana, ibi bigomba kubaho kuko kwera kw’Imana ntikubana n’ibyaha. Isi niba rero itunganywa, hari ibyo tugomba kwemera ko bibaho. Ikindi, igihugu cyacu kirindwa kubera amasengesho y’abera twinginga ngo Imana itubabarire ibyaha byacu, ituboneho amaraso ya Kristo, ntitubone nk’abanyabyaha ahubwo itwite abakiranutsi maze ibikurwaho bikurweho ariko twe turindwe. Kandi Imana niyo yadusezeraniye ko izadutabara nituyitabaza, ntizabura rero kubisohoza. Imana yacu ishimwe ndafashijwe cyane.

 

Bakozi b’Imana musengere iguhugu cyacu n’abayobozi bacu Imana yaduhaye. Barakora ibishoboka byose ngo abanyarwanda barindwe iki cyorezo ariko twe ibyacu ni ugusenga. Mureke dusengere kwezwa kwacu, itorero ndetse n’igihugu cyacu kugirango ibi bihe Imana itubone nk’abakiranutsi imbere yayo, yirengagize ibyaha byacu kubw’urukundo rwayo idukize kandi iturindire n’igihugu.

 

Tuve mu rwenya kuko iki ni igihe cyo gushikama. Ejo nabonaga mutebya ngo bashake ibibindi, nshuti zange, mumenye ko igihe cya Gidiyoni atari iki turimo kandi ndibaza ko usibye urwenya muzi ko gutsinda kwa Gidiyoni atari ibibindi ahubwo Imana yashimye ishyaka ryari mu mutima wa Gidiyoni ishaka kumwereka imbaraga zayo ngo amenye ko ishyigikiye ishyaka yari afite. Ibi ni ibihe byo gushikama, ugusenga no kwinginga hanyuma Imana akaba ariyo yikorera ibyo ibona bikwiriye muri iki gihe.

 

Imana ibakomeze, ibishimire kandi ibahe umugisha. Bishop Gahima.

 

 

 [4/3, 2:56 AM]

 

Nshuti bavandimwe, mwaramutse! Yesu ashimwe, we uduhaye ihumure rikomeye mu bihe turimo. Nasomye amakuru meza y’abakozi b’Imana ndanezerwa cyane kuko nicyo mbasabira muri ikigihe ngo mukomezwe, mubashe gukomeza n’abandi. Imana ishimwe cyane.

 

Muri iyi minsi, Imana irantangaje cyane, irankomeje, irandyoheye uburyo mutashobora kumva.

Muri iki gitondo mbonye amagambo antangaje y’uko Dawidi yabonye ukuboko kw’Imana mu bihe bikomeye kandi nyumvise cyane. 1Sam 30:1-8.

 

Dawidi yari yarahunze Sawuli wamugenzaga, ahungira mu bafilisitiya kwa Akishi. Uwo yari yaramukebeye mu bwami bwe aho kuba n’ingabo ze n’umuryango we afite ibyiringiro ko Dawidi azajya amurwanira. Ngo umunsi umwe, ajyana na Dawidi gutera Ab’isirayeli ngo bahangane na Sawuli. Bajyanye na Dawidi, bageze Ku rugerero, abatware ba Akishi banga ko Dawidi aterana nabo batinya ko yajya Ku ruhande rwa benewabo, noneho biba ngombwa ko asubira iwabo akareka kurwana. Asubiye iwabo i Sikulaji, yasanze Abamaleki bahateye, banyaze abantu n’ibintu byose, n’abagore ba Dawidi ngo banyanzwe. Ibi byavugishije amagambo menshi abari kumwe na Dawidi, baraboroga, maze ngo batuka Dawidi ndetse benda no  kumutera amabuye.

 

Icyo Dawidi yakoze icyo gihe nicyo nshaka ko duha umwanya muri ubu butumwa. 

1. Ngo ubwo bene wabo bamutukaga hamwe n’agahinda ubwe yari afite, ngo yikomereje k’Uwiteka.
2. Yabwiye umutambyi Abiyatari ngo amuhe Efodi.
3. Yagishije Imana inama.

 

Umuririmbyi w’i dirimbo ya 167 yaravuze mu mbaraga ati ,Yesu niwe nihishemo, yambereye ububungiro… Dawidi yabonye nta bundi buhungiro, nta handi imbaraga zatuma anesha ziri, kandi yari yaramenye Imana nk’inshuti ye mu byago no mu makuba kandi yari yaramenye kugiraneza kwayo. Nta kindi yashoboraga kwikomerezaho. Ngo yikomereza k’Uwiteka. Nshuti benedata,ndababwiza ukuri kandi ababizi barabizi, ntawundi twakwikomerezaho kuko ntawundi wadukunda urukundo Imana yacu idukunda, kandi ntawundi ufite ukuboko kw’imbaraga, kwakuraho situation uko yaba ikomeye kose. Umiririmbyi ati “ushobora byose arandinda, nkimwizeye nta wamunyaga”.

 

Icya kabiri, ngo Dawidi amaze kubona ko ushobora byose ariwe wamushoboza kunesha akagarura abe banyazwe, ngo yatse Abiyatari umutambyi Efodi. Iyi Efodi, wari umwambaro w’umutambyi, uvuga gukiranuka, uvuga kwambara umwambaro Uwiteka abona umuntu uwambaye akamubona nk’umukiranutsi. Nshuti bavandimwe, hari uko tugomba kuba tumeze iyo twiswe abana b’Imana. Kandi Imana impishuriye ko uyu umwambaro yishimira, ariwo mutima utunganye ugomba kutugaragaraho ibihe byose. Aba Yesu bishimira izina rye ryiza, bagomba gusa na Yesu, bakagaragara imbere ye batunganye, kandi nukuri ibi tubibashije, ntacyo tutabasha gukora. N’imisozi yakurwa ahayo kuko ni isezerano.

 

Icya gatatu: kugisha inama Imana ni ugusenga. Nshima Imana cyane kuko yuzuye imbabazi. Iyo twicishije bugufi ikagaragara nk’Imana kuri twe, idukorera ibyo tutabasha. Ntitugira inama gusa ahubwo iranaturwanirira. Niko Imana yamwijeje ko natera abamaleki abatsinda, ariko mu kuri, batsinzwe  n’Uwiteka. 

 

Mbabwiye byinshi ariko icyo mbifuriza nuko mu bihe bikomeye nk’ibi, ntahandi imitima yacu ikwiye kuba. Mureke twikomereze k’Uwiteka, ikindi mureke twisuzume, ese Uwiteka aratubona mu mwambaro ukwiye, twambare gukiranuka, twange ibimugaragarira nk’Umwanda, twambare ibituma atwishimira aribyo: ingeso nziza zose no gukiranuka n’ukuri (Abef 5:9). Ibi bitubere Efodi. Ibindi tutabasha tubimuharire azabisohoza neza. Imana y’amahoro ikomeze kubishimira kandi ibahe umugisha. Bishop Gahima.

 

 

[4/4, 4:34 AM]

 

Yesu ashimwe cyane benedata, hari abo mbona bari maso, Uwiteka abishimire mwese abari maso aya masaha aryoheye ibitotsi. Nibwo butwari kandi Ijuru mwibuke ko rizagibwamo n’intwarane, dukomeze rero gutwarana.  

 

Iki gitondo, tubatuye indirimbo ya 14/1. Iyi ndirimbo izamura icyubahiro cy’Imana nkayikunda kuko ifite Haheluya 25. Iki rwose ni igihe cyo kuzamura icyubahiro cy’Imana yacu. Muri iki gitondo, Imana yongeye kunyigisha Indi ngingo mu magambo twize ejo numva ndatangaye 

 

1Sam 1-8: Nimwongera kuhasoma murasanga ko bagaruka i Sikulagi, Dawidi yari kumwe n’Ab’Isirayeli 600 b’intwari bari baramukurikiye mu buhungiro kuko bari bamwizeye kandi bamukunze. Iki nicyo gihe yari akeneye ubufasha bwabo ubwo yajyaga gutera abamaleki. Nabo ubwabo bagombaga kurwana kugirango bagarure ababo banyazwe. Gusa ngo bageze ku kagezi ka Besori, yari asigaranye 400 abandi 200 bari batakaye mu nzira. Bambuka Besori abandi 200 bari bananiwe cyane nabo barasigara. Bivuze ko yageze aho abamaleki bakambitse, asigaranye ingabo 200 gusa. Nta bwoba yari afite kuko Imana yari yamaze kumukomeza ko anesha abamaleki. Kandi yari yaramenye imbaraga z’Imana ye nuko itajya yivuguruza,  ntiyita ku basigara ahubwo arakomeza kandi nkuko Imana yari yamubwiye, banesheje abamaleki, bagarura ibyabo n’ababo , nta nuwakomerekeye ku rugamba.

 

Nshuti benedata, hari igihe twizera imbaraga z’abantu cyane cyane iyo tureba ubukana bw’ibyo turwana nabyo. Nukuri ibi ntibikwiye nagato kudutera ubwoba. Imana inyigishije ko ahubwo dukwiye kureba imbaraga z’uwo dutabaranye, watubwiye ko atazaduhana. Nigeze kubwira umwana wange muto turi kumwe mu modoka nti “wanze kuguma murugo none nitugera ku bapolisi baragufata”, nari nzi ko atinya akareka kujya mu modoka. Umwana yaranshubije ati ndababwira ko ndi kumwe na Papa. Kuri we, kuba kumwe na Papa byari bihagije ko abapolisi batamufata. Numva Imana ishaka ko tuyizera dutyo,  tutayibangikanije n’ikindi icyo ari cyo cyose. Nta bwoba dukwiye kugira ngo twizere abantu, Imana yacu igaragariza ubishobozi bwayo mu bihe bikomeye nk’ibi. 

 

Ndasenga ngo mu bihe nk’ibi turimo, aho ibihugu bikomeye binyeganyejwe, Imana itugaragarize uburinzi bwayo bukomeye, amahanga abone ko atari imbaraga ahubwo ari ubuntu bwayo. Yesu ati, “Mwizere Imana nange munyizere”. Nukuri  arahagije wenyine. Ndasenga ngo mu bihe turimo, amaso yacu ahwejejeshwe, tubone kwera no gukomera kw’Imana mu bundi buryo buruta uko twajyaga tubibona, bizamure kwizera kwacu. Bizatubera ubutsinzi. Imbaraga ze zirenze imiti yo kwa muganga, zirenze ubuhanga bw’abashakashatsi, zirenze ibiriho n’ibizaba. Icyubahiro cyose n’ igitinyiro cyose bibe iby’Uwiteka iteka ryose. Imana data, Umwana , Umwuka Wera abahe amahoro n’Umugisha none n’iteka ryose. Bishop Gahima.

 

[4/4, 8:01 AM]

Abasomye ubutumwa nanditse, mwabonye ko igice cyanditse nabi. Sorry ni 1Sam 30:1-8. Gusa in cyakindi cy’ejo ndibaza ko bitabagoye.

 

[4/4, 8:36 AM]

Nange nongeye kubibutsa gahunda itangira uyu munsi yo kwiriza no gusengera igihugu cyacu twifatanyamo na benedata bose bo mu matorero ari muri Peace plan. Tuzasoza kuwa mbere.

 

 

[4/5, 5:35 AM]

 

Nshuti benedata, Yesu ashimwe cyane. Uyu munsi, dutangiye icyumweru cyera, kandi tugitangiye neza Umwami wacu ajya i Yerusalemu. Ngo amanutse ahetswe n’indogobe, abantu bose barahuruye bamubonye, babona ko ari Umwami, basasa imyenda yabo n’amashami y’ibiti mu nzira ngo indogobe imuhetse idakandagira ku butaka. Barahimbazaga bati, ” Hoziyana mwene Dawidi, hahirwa uje mw’Izina ry’Uwiteka, Hoziyana ahasumba hose”. Mat 21:8-9. 

 

Nuko Yesu yinjira mu rusengero rw’Imana, yirukanamo abaruguriragamo bose, yubika ameza y’abavunjaga ifeza, n’intebe z’abaguraga inuma arababwira ati “byanditswe ngo inzu yange izitwa inzu yo gusengeramo, ariko mwebwe mwayihinduye isenga y’abambuzi”. Nuko impumyi n’ibirema bamusangaga mu rusengero arabakiza. Mat 21:12-14.

 

Muri iyi nyigisho, hari ibintu bicye nifuje kugarukaho.

1. Yesu yari aje gusoza umugambi wo kuducungura kandi byagombaga gukorerwa i Yerusalemu ngo isezerano cy’Imana   risohozwe. I Yerusalemu niho hari icyicaro cya Abraham, niho hari igicumbi cy’isezerano. Niho hari umurwa wa Dawidi, niho hari umusozi wa Siyoni. Imana ntijya yibeshya, isohoza ibyo yasezeranye ku murongo. 
2. Ababonye Yesu bagiye banezerewe baramushagara bashima Imana bati Hoziyana… Igikorwa yari agiye gukorera I Yerusalemu cyari igikorwa cyagombaga gukorwa nawe gusa, kuko nubwo yagiye nk’Umwami ashagawe atyo, Ijuru ryamubonaga nkuko mu Byahishuwe 5:1-14 bamubonye ubwo yahagurukaga kubumbura igitabo abandi bari batinye kuko ntawundi washoboraga kukibumbura usibye Uwera w’Imana wemeye gutanga ubugingo bwe ku bwacu, umucamanza wemeye kuba impongano y’ibyaha byacu. Natwe tumuzamuriye icyubahiro. Yari aje mw’isura y’urukundo rudasanzwe kuko yari aje kutuneshereza urupfu no kudukuriraho umujinya w’Imana ngo yikorere ibyaha byacu kugirango  muri we tube abakiranutsi.
3. Yari aje gutunganya Urusengero rwari rwarahindutse isenga y’abambuzi. Pawulo we avuga ko urusengero rw’Imana ari imibiri yacu. Yesu niwe wenyine ushobora kwirukanamo ibidutandukanya n’Imana aribyo byaha. Ndasenga ngo uko yirukanyemo abavunjaga n’abacururizaga mu rusengero utavuga ko no kuriganya batariganyaga, abe ariko Yesu akura mu mitima yacu ibyaha byose bituma tujya kure y’Imana yacu ahubwo ayitunganye imubere ubuturo.
4. Yesu amaze gutunganya urusengero, yagumyemo kandi abamusangagamo bose yabakizaga indwara zabo. Ndasenga ngo iyi Mashami ndetse na Pasika tuzizihiza ku cyumweri gitaha bitwigishe kurutaho imbabazi z’Imana yacu kandi imirimo ya Yesu yigaragaze mu bugingo bwacu cyane. Adukize indwara z’Imibiri ndetse n’iz’imitima kandi yeze ubugingo bwacu nkuko yejeje urusengero.

 

Icya nyuma, iki cyumweru dutangiye kirimo iminsi y’umubabaro wa Yesu azira ibyaha byacu. Ndabasaba ngo kitubere icyumweru cyo kwegerana n’Imana, kwihana no kuzirikana icyatumye Yesu yemera kubabazwa ako kagene ndetse no kugambirira kubaho mu buzima bunejeje Imana yacu. Muhumure kizasoza neza, twizihiza kuzuka kwa Kristo ariyo ntsinzi ku bamwizera bose. Imana ibahe icyumweru cyiza cyuzuye umunezero ko kwishimirwa n’Imana. Amahoro y’Imana abane na mwe mwese.

 

 

[4/7, 4:11 AM]

 

Mwaramutse nshuti bakundwa, Imana yacu ishimwe kuko iduhaye undi munsi mwiza wo kubaho n’umugisha wo kongera kwigishwa nayo. Iki gitondo, Imana impaye indirimbo nziza ndetse n’amagambo antangaje nsa nkaho nyabonye bwambere kandi nari nsanzwe nyasoma. 

Indirimbo ni iya 45/1. Ndagushaka Mwami Yesu. Uwiteka ayibanezereshe.

 

Ku munsi nkuyu, Yesu yari mu bihe byo gusoza urugendo rwe muri iyi si. Icyanejeje muri iki gitondo, nakangutse gusenga numva umutima wange uguwe neza “kuko Yesu ari i Yerusalemu”. Aha  yirirwaga mu rusengero yigisha, akarara ku musozi was Elayono asenga Imana ngo ahabwe imbaraga ariko nanone ngo Imana ihumure abantu amaso bamwumve, bahishurirwe amabanga y’ijuru bakizwe. Amagambo ankomeje cyane ari muri Mat 23:37-39.

“Yerusalemu, Yerusalemu, wica abahanuzi ugatera amabuye abagutumweho, ni kangahe nshaka kubundikira abana bawe nkuko inkoko ibundikira imishwi mu mababa yayo ntimunkundire. Dore inzu yanyu muyisigiwe ari umusaka. Ndababwira yuko mutazambona uhereye none ukageza ubwo muzavuga muti, ‘Hahirwa uje mw’Izina ry’Uwiteka’. 

 

Nshuti benedata, Imana ishimwe cyane. Yesu atubwiye amabanga. Nubwo muri Yerusalemu abanditsi n’abafarisayo bananiwe kubera abantu urugero rwiza, hari abagiriye umugisha muri Yesu bigishwa nawe, barahinduka, abo babundikwe nawe muri Yerusalemu yari yabaye ingume kw’ijambo. Abo ni abamugiriyeho umugisha nka Mariya Magdarena yirukanyemo abadayimoni, ni nk’intumwa ze, ni nka ba Zakayo n’abandi bagiriye umugisha kuri Yesu mu bihe ubuyobe bwari bwinshi. Abo biyigishijwe na Yesu ubwe, baramwemera, barahinduka, bari batakiri aba Yerusalemu ahubwo bari ab’ubugingo burenze Yerusalemu. Bahavanye intsinzi ya Yesu akiri mw’isi kandi yakomeje kugaragaza amabanga y’ijuru ngo benshi nabo bayamenye bakizwe ariko ntibabimenya. 

 

Imana ishimwe ko no mu buyobe buriho ubu , mu rugamba rwo gushaka ubukire bw’isi mw’itetambere rizamuka uko bwije nuko bukeye, hari abo Imana yisigarije, batoranirijwe ubugingo, abo ni abiyigishirijwe na Yesu, batigishijwe n’abigisha bandi. 

 

Icya kabiri, Yesu yarababwiye ati ntimuzongera kumbona kugeza Ku kugaruka kwa kabiri. Nyuma yo kuzuka, usibye abari baramumenye, baramwizeye , arizo ntumwa ze n’abandi bari baromatanye nawe mu gakiza nka Mariya , abandi ntibigeze bamubona. Iki ni ikizere gikomeye kuri twe nshuti z’Imana. Ashimwe Yesu ko natwe twamubonye nk’Umwami n’Umukiza kandi ko ibyo yabikiye abo yabanye nabo ari muri  iyi si natwe twabibonyeho ingwate nyuma y’iyi myaka yose. Ari i Yerusalemu rero, aracyafite ubushobozi bwo gukiza no guhindura amateka yacu ndetse no kutubundikira mu mababa ye nkuko inkoko ibundikira imishwi yayo. 

 

Ndasenga ngo tugire ihishurwa rishya riduhuza neza na Yesu akaturemera amateka mashya n’iherezo rishya ryo mu bugingo buhoraho, ndasenga kandi ngo amaso yanyu ntimuyahange abatambyi ahubwo muyahange Kristo ubwe kuko niwe nzira, n’ukuri n’ubugingo kandi Ubwami bwe ntibuzashira. Imana ibahe umunsi mwiza. Bishop Gahima.

 

 

[4/8, 5:07 AM]

 

Mwaramutse nshuti za Yesu, twongere tugendane na Yesu muri ibi bihe bikomeye yanyuzemo kandi tumusaba kudukomeza muri ibi bihe turimo natwe byo kwibuka abacu bazize Jenoside yakorewe abatutsi. 

 

Ku munsi wa Kane ariwe uyu, muri Matayo 26 niho dusanga igikorwa kimwe gusa cyakozwe ariko gikomeye . Mat 26:6-13, hatwereka ko Yesu yari I Betaniya mu nzu ya Simoni Umubembe n’abigishwa be ngo haza umugore witwa Mariya Magdalena afite umukondo w’amavuta y’igiciro ayamusuka mu mutwe. Hari ibintu bine ngirango turebe  byaranze uyu munsi.

 

1. Betaniya hari Ku musozi wa Elayono, aho Yesu yajyaga afashirizwa cyane. Ni ahantu yakundaga cyane kuko hari inshuti ze Lazaro, Mariya na Marita, ni ahantu ubundi havuze “gukunda gufasha abandi” kandi koko Yesu nawe ubwe yarahafashirizwaga n’Imana se ariko yanahakoreye n’igitangaza gikomeye cyo kuzura Lazaro. Yarahasengeraga akahuzurizwa, akahava yuzuye imbaraga zimubashisha gukora umurimo wa Data. Ni naho rero yagombaga gukura imbaraga zimushoboza kwihanganira ibizamubaho bikomeye ku munsi ukurikira (ejo nimugoroba no gukomeza). Wowe mwenedata, mu bihe byawe bikomeye, wihererera he? Ese wifuza guhabwa iki, ukora iki?. Imana ishimwe ko itumenera amabanga yayo ngo tumenye uko Yesu yifataga mu bikomeye ngo natwe tube ariko twifata.
2. Uyu mugore Mariya Magdalena, yazanye amavuta ahenze ayasuka kuri Yesu nk’ikimenyetso cy’urukundo kuri we ariko ari nanone ikimenyetso cy’ubuhanuzi Ku rupfu rwa Yesu. Mariya yari yarakunze Yesu wamugaruriye agaciro n’ubuzima ubwo yamukizaga abadayimoni barindwi bari baramubase, kuburyo kuri we nta cyamurutiraga Yesu. Nshuti ujya wibuka aho Yesu yagukuye? Wumva wowe wamugenera iki iyo ubyibutse. Nta kindi Yesu yishimira nuko tubona ubugingo buhoraho kuko nicyo cyamuzanye, ni nacyo cyatumye abambwa kandi ntitwabona ubugingo tutazinutswe ibyaha byose. Imana idufashe.
3. Ababonye uriya mugore asuka amavuta kuri Yesu babibonye nko kwangiza ngo batekereza agaciro k’impiya. Niho imitima yabo yari iri. Nshuti bavandimwe, Yesu yarababwiye ati iki ni igikorwa gikomeye “kuko ateguriye umubiri wange guhambwa”. Ati kandi iki igikorwa gitumye azajya ahora yibukwa. Mu bihe nk’ibi. Abigishwa bo bari bahabye rwose.  ndasenga ngo Imana iduhishurire ubwiru bwayo ngo dukore ibikwiriye, twifate mu buryo nyabwo tudatekereza ibyacu nk’abantu.
4. Bibiliya itubwira ko Yuda we yahise agenda kugirango asoze umugambi wo kugambanira Yesu Ku banditsi n’abatambyi bari biriwe bataruhutse barajwe ishinga no kwikiza Yesu. Umwami wacu yatekerezaga uburyo agiye kudupfira ngo tubone ubugingo, abandi batekereza ibyo kumubamba ngo bamwikize. Ibi byanyigishije uko abantu bakunda abandi n’umutima wabo wose, hakaba ubwo abo bakunda bo batekereza nabi Ku babakunda, ndetse bakabagambanira. Ibi njya mbibona rwose. Imana iduhe urukundo rw’ukuri muri ibi bihe kandi twe kuruhande rwacu dukunde abantu tutitaye Ku badukunda cyangwa abatwanga. Yesu yagaragaje urukundo kugera Ku munota wa nyuma, anazutse nta nzika yazukanye.

 

Nsoza, nkuko uyu munsi wari kuri Yesu asenga yitegura urugamba rwanyuma, natwe ndasenga ngo utubere umunsi wo kubana n’Imana mu mutima, twibaza uburyo twanesha ibitugerageza, uburyo twagira urukundo ariko ikirenze n’ibyo, uburyo twakomatana n’Imana yacu tukaba inshuti zayo akaramata kuko niyo soko y’imbaraga zacu. Imana ibahe umugisha. Bishop Gahima.

[4/9, 5:31 AM]

 

Mwaramutse benedata Ku munsi nk’uyu(kuwa Kane Wera), ubundi dusangira Umubiri n’amaraso by’Umwami wacu Yesu “Kugirango tujye duhora tumwibuka” nk’itorero. Uyu munsi, ibi ntibiribushoboke kubera ibihe turimo. Abapasitori bashobora kubikora mu miryango yabo ariko abandi ndabasaba tugire umwanya wo kubana na Yesu muri ya masaha kugirango twifatanye nawe n’abigishwa be muri ririya gaburo mu mwuka. Kubwange ndumva dufashwa kuko nubundi dusabanira na Kristo mu mwuka kuko niwe mufasha twasigiwe wo kudufasha ibihe byose. 

 

Uyu munsi nibwo Kristo yagambaniwe, arafatwa, arashinyagurirwa ahatwa ibibazo mu nzego zitandukanye z’ubuyobozi ashinjwa ibinyoma ariko ibi byose byamubayeho kubwacu. Ijoro ryose yarimaze agaragurwa ababazwa ndetse no kugera aho inshuti ye Petero amwihakana kubera ubukana bw’urupfu. 

 

Uyu munsi nahisemo  ko turebana inyigisho iri muri Matayo 26: 36-46- ubwo Yesu yajyaga gusengana umubabaro i Getsemani. Muri iyi nyigisho, Yesu yarebaga urupfu, yambaye ububiri, maze umubiri  uramugerageza pe. Twibukiranye ko Yesu yambaye umubiri Ku bwacu ngo tubashe kumubona amaso kuyandi, yigishe abantu bamwumve ndetse  kugirango atubere uw’ibanze mu kwikorera imitwaro yacu nk’inzira yacu, n’ukuri n’ubugingo ngo tubone uko tuzagera kwa Data, uyu umubiri waramugerageje, yumva ubukana bw’urupfu cyane. Bibliliya itubwira ko yajyanye na Petero na Yohana na Yakobo bene Zebedayo ngo babane nawe maso agiye gusenga ariko ngo birabananira. Uko yajyaga gusenga barasinziraga yagaruka agasanga basinziriye kugeza aho ababaza ati koko munaniwe kwihangana ho n’umwanya muto? Yesu yari yababwiye ko afite umubabaro mwinshi, yabajyanye nk’inkoramutima ze ngo bamukomeze kandi abane nano muri icyo gihe kitoroshye, na Petero yaje kumwihakana muri iryo joro noneho Ku mugaragaro. Yesu gusa yakomeje kubakunda atitaye kubyo bo bakoze kuko yari azi ubukana bw’umubiri. Ibi bintwaye umwanya mbibabwira kuko mu gihe cy’umubabaro, nibwo umuntu akenera inshuti zibabarana nawe, zikamuhumuriza. Hamwe no kubana na Yesu, natwe ubwacu iki nicyo gihe cyo kwegerana cyane, nibwo hari icyorezo cya Covid 19, ariko tubane mu mwuka, dusengerane kandi ube umwanya wo kwereka Yesu ibitugoye kugirango intsinzi ye yo kumusaraba isohorane no kunesha ibitugoye byose. 

 

Icya kabiri, mu gusenga kwa Yesu, nubwo yari atewe ubwoba n’urupfu, ntiyaburanije Imana ngo ayibaze impamvu azira ubusa, cyangwa ngo ayibutse ko we yakabaye umucamanza ucira iteka ku banyabyaha ahubwo yabwiye Imana ati “ibyo ushaka abe aribyo biba”. Nshuti z’Imana, aha iyo mpageze ndatsindwa cyane. Mu mibereho yacu dukunda ” kwemeza”. Ibyo dushaka buri gihe tuba dushaka ko aribyo bikorwa, rimwe na rimwe atari nabyo bikwiye ariko tukabihagararaho. Imana iduhe kumva ko buri gihe ubushake bwayo aribwo bugomba kuba. Twige gushyira Imana yacu Imbere ya byose ibihe byose. Yesu yari afite impamvu zose zumvikana kuko yararenganaga ariko ntiyaburanije Data kuko yari azi urukundo Imana yakunze abari mwisi bituma yemera byose. Ashimwe Yesu wemeye kubabazwa mu mwanya wacu. 

 

Ndasenga ngo iki gihe cyo kubabazwa kwa Yesu Ku bwacu, kitubere ibihe cyo gucishwa bugufi, cyo kwemera uburemere bw’ibyaha byacu no kwihana. Imana ibane namwe muri ibi bihe twibuka abacu bazize Jenoside yakorewe Abatutsi kandi ari nabyo bihe Umwami wacu yababajwe akicwa kubwacu abantu ngo dukizwe. Imana ibahe umugisha. Bishop Gahima.

[4/10, 4:08 AM] Dr Gahima: Nshuti benedata, mwaramutse? Yesu ashimwe cyane. Iri joro nasinziriye, nkanguka nibaza , ese nange ko nabaye nka Petero na Yohana na Yakobo basinziranye Yesu kandi aricyo gihe yabifuzaga kuruta ibindi bihe, gusa Imana ishimwe kuko ubwo nabyibazaga yankomeje, numva urukundo rwayo cyane, nibuka ko Yesu yakomeje gukunda abo bagabo cyane kuburyo anasubira mw’Ijuru yasigiye Petero inshingano yo kuyobora itorero ry’Imana. Nawe niba wasinziriye wari wagambiriye kugumana na Yesu, icyo gisubizo nahawe kigufashe.

 

Imana nibaha  umwanya musome Yesaya 53 igice cyose, murabonamo iby’urupfu rwa Yesu uko rwahanuwe imyaka n’imyaka mbere yo kuza kwa Yesu, murahishukirwa ko umugambi w’Imana wo kuducungura wabayeho kuva kera. Hari imirongo imwe nifuza kugarukaho. Yes 53:4-6, ” Nu ukuri intimba zacu nizo yishyizeho, imibabaro yacu niyo yikoreye, ariko twebweho twamutekereje nk’uwakubiswe n’Imana agacumitwa nayo, agahetamishwa n’imibabaro. Nyamara Ibicumuro byacu nibyo yacumitiwe, yashenjaguriwe gukiranirwa kwacu, igihano kiduhesha amahoro cyari kuri we, kandi imibyimba ye niyo adukirisha. Twese twabaye nk’intatane, Uwiteka amushyiraho gukiranirwa kwacu twese”. Umuririmbyi w’indirimbo ya 149 yararirimbye ati  “Mbega urukundo rw’Imana yacu ntawarondora uko rungana…. Asoza igice cyanyuma avuga ati “kandi uko ikunda Umwana wayo, niko inkunda ntakwiriye… Nshuti z’Imana, uru rukundo koko twarugereranya n’iki? Jye birandenga. Gusa Imana ishimwe ko yadukunze ityo. Umuririmbyi w’indirimbo ya 155 igice cya gatatu, yararirimbye ngo          “birya byuya by’amaraso, ntangara iyo mbyibutse, ati ibyo byabaye kuwange, rya joro i Getsemani…”ibi byose, ni ibitwibutsa urukundo Imana yadukunze kandi icyo nkwifuriza wowe usoma aya magambo, ni ukugirango usobanukirwe ko Imana yagukunze urukundo rudasanzwe kandi kuko yabigambiriye cyera, ntiyabitezukaho, icyo yifuza gusa ni umutuma wawe uyikunda, uyumvira kandi uzirikana gukora ibyo ishaka. 

 

Yesaya aravuga ibi muri Yes 53:11a “Azabona ibiturutse mu bise by’ubugingo bwe bimwishimishe, bimuhaze.. ” uwo ni Yesu, iyo atureba turi mu gakiza, data atwishimiye, yumva ataragiye ku musaraba ku busa. Rero nshuti z’Imana mureke ibi bihe bidufashe kugambirira bushya kutazamuvaho nkuko abatubanjirije mu bubyutse bwa Gahini basezeranaga n’Umwami wacu ko batazamuvaho, buri mwaka bakaza i Gahini kuvugurura aya masezerano. Imana nukuri iduhe gukomerera muri aka gakiza twaboneye mu mibabaro ya Yesu. 

 

Hari ukuntu Abakristo bavuga ngo bahawe agakiza ku buntu.  Ndagirango mbabwire ko aka gakiza tutagahawe ku buntu. Katanzwe ku kiguzi gifite agaciro gasumba akandi kose kuko katanzwe ku bugingo bwa Kristo utarakoze icyaha ahubwo wabaye impongano y’ibyaha byacu. Umuririmbyi Apollinaire yaririmbye indirimbo ye ivuga ngo” Umva icyatumye mpinduka nkitwa Umukunzi, nuko hari uwiyambuye ubwiza bwose, yambara umuvumo wose n’ububi bwange..” Ndayiboherereza ninyibona. 

 

Ndabasengera kandi namwe dufatanye, dusabe Imana imbaraga nshya zo kuguma twomatanye n’uyu mwami watwitangiye ngo atubere inzira itugeza kwa Data bimugoye ariko kuko yabona ari ngombwa yemera kubabazwa ako kagene. Yesu wacu ahimbazwe iteka.  Imana ibahe umugisha n’imbaraga zo guhagarara mushikamye. Amahoro y’Imana abane namwe. Bishop Gahima.

 

[4/10, 4:16 AM]

 

https://youtu.be/sW4snH_ot9I

 

 

[4/11, 3:52 AM]

Nshuti benedata, Yesu ashimwe.  mw’ijoro nk’iri Umwami wacu yaraye ahambwe, ntibyari byoroshye ku nshuti za Yesu. Ku ntumwa ze , Umwigisha wabo, inshuti yabo, yari yabakuwemo, bamwe ndetse bari bagifite ipfunwe ry’uko bamutereranye, abandi ndetse bari bamwihakanye nka Petero inshuti ye, Yuda yari yiyahuye yavuye mu mubiri, ku bamukurikiraga nka ba Mariya Magdalena, Marita, Suzana ndetse na Nyina Mariya n’abandi, agahinda kari kose, abari ku musaraba ubwo yaruhukaga ava mu mubiri bakabona ibitangaza, bakavuga ngo koko yari umwana w’Imana,  nta kindi bari bakibona ndetse bibazaga byinshi ku byo bakoreye Yesu, ahari nabo baricuzaga. Abatambyi n’abanditsi bo bumvaga misiyo bayirangije, batekereza ko Yesu bamurangije, Muri macye, hari igihu cy’urwijiji, nyine umugambi w’agakiza, mu mitekerereze y’abantu, wasaga nkaho warangiye. 

 

Gusa ndagirango nkubwire inkuru nziza nshuti, Isezerano ntiryari ryashojwe. Ahubwo nibwo ryari rigeze aho ryenda gusohora. Nkuko isezerano ry’agakiza kacu ryarwanijwe, ninako buri gihe Satani arwana inkundura iyo abona gutabarwa kwacu kugiye kugera. Ibi bidusaba iki, tugomba kuba maso, buri gihe tukamenya ko ahora abunze ngo atunanize. Gusa nshuti nziza, intsinzi ya Yesu mu kuzuka kwe yabaye urufunguzo no ku bindi bigeragezo byose twacamo. Rero mumenye kandi mwishimire ko twatsindishirijwe mu rupfu rwa Yesu kandi uyu munsi utubere nkuko umubyeyi ategerezanya amatsiko kuvuka k’umwana atekereza umunezero uwo mwana azanye mu muryango. Dutegure imitima yacu kugirango kuzuka kwa Yesu kuzaze imitima yacu icyeye natwe abapfuye kubyaha tuzukane nawe  mu gukiranuka. Imana ibahe umugisha. Bishop Gahima.

 

 

[4/12, 4:39 AM]

 

Yesu ashimwe nshuti z’Imana. Haleluya!! Yesu yazutse. Mwakire intsinzi y’Umwami wacu Yesu yatubereye umusingi w’itorero kugeza uyu munsi.

 

Mu butumwa bwiza bwa Luka 24: 30-32, “yicaye ngo asangire nabo, yenda umutsima, arawushimira, arawumanyagura arawubaha. Amaso yabo arahumuka, baramumenya, maze aburira imbere yabo, ntibongera kumubona. Baravugana bati, “yewe ntiwibuka ukuntu imitima yacu yari ikeye ubwo yavuganaga natwe turi mu nzira adusobanurira ibyanditswe”. 

 

Aya magambo aradusobanurira igihe Yesu yari amaze kuzuka, amaze kubonekera bamwe mu bigishwa be noneho yongera kubonekera babiri mu bandi bigishwa be bajyaga Emawusi. Ngo baganiraga ibyabaye, bafite agahinda ko Yesu yatanzwe ngo yicwe n’abatambyi bakuru n’abatware, ariko batazi ko  uwo bavugana nawe ari Yesu. Yaganiriye nabo ndetse yemera no kujyana nabo aho bagombaga gucumbika iryo joro.  Muri iyi nyigisho, icyo nifuza ko wibuka nuko ” igihe Yesu yari kumwe nabo, imitima yabo yari ikeye nubwo ka gahinda bari bakigafite batarasobanukirwa ko uwo bari kumwe ari Yesu wazutse.

 

Iyi Paska ije mu bihe bitoroheye Abanyarwanda. Ibihe byo kwibuka Abacu bazize Jenoside yakorewe Abatutsi muri 1994, ndetse no kuba abantu bari mu mago yabo kubera icyorezo cya Covid 19, ntibisanzwe. Hari benedata bibuka bamwe mu miryango yabo bishwe muri Jenoside bari mu gahinda gakomeye, hari bamwe muri twe batagifite uko baca incuro kubera ibi bihe, bivuze ko imibereho yabo itari myiza, hari abahangayitse kubera ababo batabasha kuva aho bari kubera iyi gahunda yo kuguma murugo n’ibindi bibazo. Ndagirango mbabwire ko ibi bihe rwose bitoroshye kuri twese nk’itorero by’umwihariko n’Abanyarwanda muri rusange. Gusa nshuti nziza, kuzuka k’Umukiza wacu Yesu in igisubizo kuri ibi bibazo byacu byose. Nkuko amahoro ye yasabye ba bigishwa kubera”presence ye” muri bo, ndaguhamiriza ko uwabonye Yesu wazutse abona amahoro aruta ayo abantu bibwira. Aya amahoro ntaza kuko ibibazo byashize, ntaza kuko amaso yacu aba atagihweza cyangwa ngo tube tutagifite ubwenge butekereza ahubwo nuko tuba twabonye igisubizo cy’ibibazo biriho n’ibizabaho. Uwo niwe wahawe ubutware bwose nkuko bigaragara muri Yesaya 53:11-12.

 

Icyo mbifuriza muri iyi Paska, ni ukugirango Imana ibanezeze ibarenze ibibazo byose, kuzuka kwa Kristo kubabere intsinzi kandi Umwuka abahumure amaso mubone imbaraga twahawe ubwo Yesu yamaraga kuzuka. Yatsinze urupfu n’ikuzimu, yambuye Satani imfunguzo z’ikuzimu. Yaratuneshereje, no mu kuzuka atubereye inzira. Muhumure rero, abibuka ababo tuzabonana nabo kuko Yesu Kristo niwe kuzuka n’ubugingo, abapfuye bamwizera bazabaho iteka, abo tuzabonana nabo. Ku bari mu bibazo by’imibereho muri iyi Minsi Kristo yarazutse kandi ntajya abura uko abigenza ndumva ibi mubizi. Ku barwaye ubu burwayi bwa KoronaVirusi, Kristo yahawe ubutware bwose bwo mw’isi no mw’ijuru kandi niwe muganga usumba abaganga bose. Abakize niwe wabakijije kandi n’abakirwaye azabakiza twe gutinya  rero ahubwo tumwizere. Ndetse n’iki cyorezo kizakurwaho vuba ubuzima busanzwe bugaruke kandi bizarangira benshi bamumenye kurutaho.

 

Imana y’Amahoro rero ibane namwe muri ibi bihe bitoroshye, ibanezeze, kandi ayo mahoro abe ku banyu bose. Umugisha w’Imana Data wa twese,  Umwana n’Umwuka Wera ubane namwe kuri iyi Paska ndetse no kugeza iteka ryose, Amen. Bishop Gahima.

 

 

 

 [4/14, 6:22 AM]

 

Yesu ashimwe benedata bakundwa cyane muri Kristo Yesu Umwami wacu. Natinze kuboherereza ubutumwa bw’uyu munsi ho gato kubera ibyo Umwami wacu yanyigishaga gusa Imana yacu ishimwe kuko ijya itubera maso. Dore inyigisho y’uyu munsi: Yes 62:1-7. “Kubw’urukundo nkunda i Siyoni, sinzatuza, kuko ngiriye i Yerusalemu, sinzaruhuka kugeza ubwo gukiranuka kwaho kuzatambika nko gutangaza k’umuseke n’agakiza kaho kakamera nk’itabaza ryaka….ku murongo wa 6 ” Yewe Yerusalemu, nshyize abarinzi Ku nkike zawe, ntibazaceceka kumanywa na nijoro. Yemwe abibutsa Uwiteka, ntimugatuze. Kandi ntimukamuhwemere kugeza ubwo azakomeza i Yerusalemu akahahindura ishimwe mw’isi”. 

 

Muri iyi munsi 40 y’amasengesho tumazemo iminsi, Imana yampishuriye ko tudakwiriye kwibaza kuri Yerusalemu nka Yerusalemu ivugwa muri Bibiliya ahubwo ngo kuri twe, ubu Yerusalemu ni Imitima yacu,  kuko niyo cyicaro cy’Uwiteka, Yerusalemu ni itorero ry’Imana naho ubuturo bwa Kristo ubu ntibukiri Yerusalemu, niwe uzi ‘Yerusalemu’ nya Yerusalemu nshya adutegurira. 

 

Icyo Imana imbwiye muri iki gitondo nyuma y’ibyo inyeretse gusa, nuko tugomba kuba maso, tugasenga tudatuza,

twibutsa Uwiteka isezerano yaduhaye ryo kuturinda, kurinda itorero rye, no kurinda igihugu cyacu ubuyobe buriho ndetse n’imirimo ya Satani ikorwa kumuharagaro abantu basa naho batabibona. Mureke twemere gufuhirwa kw’Imana kuko hariho benshi bavanga gusenga ibigirwamana kandi bakavuga Izina ry’Imana nyiringabo. Amasengesho yacu niyo azasenya ibihome bya Satani. Ibi rero benedata, biradusaba ibi bikurikira:

1. Kutadohoka mu gusenga twibaza tuti Imana izi ko tumaze igihe dusenga. Oya.. Gusenga ni uguhozaho. Yesaya 62:6-7 ati “ntimugatuze kandi ntimukamuhwemere”. Umugisha tugira nuko Imana iyo idutegetse gusenga iba yiteguye kutwumva kandi hari icyo iba ishaka gukuraho.
2. Gusenga dufite intego yo kurindwa kw’itorero n’igihugu cyacu ngo igihu cyo kutamenya Imana n’imigambi yayo mizima ku bwoko bwayo gikurweho. Abantu be kureba abandi nk’ibisubizo ahubwo barebe Imana nyiringabo. Kwizera kongerwe imbaraga mw’isi, abantu babone Imana nk’Imana isumba byose. 
3. Abatambyi baheka iby’Uwiteka twiyeze (Yes 52:11). Kugirango duhagarare mu cyuho, biradusaba kuba twishimiwe n’Imana yacu. Imana idushoboze. Ibi rero biradusaba kuba maso nshuti z’Imana. Mureke tugerageze. Abanyamasengesho muri twe babibwirwe, twese dusenge duhuje umutima kandi ubudasiba, tugambirira gusa na Yesu, tunezeza Imana yacu, nukuri icyo nzi cyo, nitubikora dutyo, Iki cyorezo cya Corona Virusi kizakurwaho, ubuzima buzasubira uko byari bisanzwe ariko imbere y’Imana tuzakomeza kugaragara nk’abadasanzwe kandi Imana Izatwishimira. 

 

Nsoza, ndabibutsa ko muri ibi Imana yatubwiye, harimo isezerano ryo kuturinda, ” Yewe Yerusalemu, nshyize abarinzi ku nkike zawe”. Muhumure turarinzwe igihugu cyacu kirarinzwe ndetse n’itotero. Imana izi ibiturwanya kandi izi intege nke zacu. Ibyo tutazashobora si ibyacu, ni ibyayo. Twe gusa turasabwa kuba maso, gusenga no gutunganira Imana. Imana ibidushoboze mw’izina rya Yesu.

Imana data ibahe umugisha kandi mugire umunsi mwiza. Bishop Gahima.

[4/15, 4:56 AM]

 

Ubuntu n’amahoro bitangwa n’Imana Data bibe kuri mwese benedata. Iki gitondo Imana ingiriye neza nukuri. Reka dusangire iyi ndirimbo ya 385. Nayiraranye ndanezerwa. Ni iy’ibihe byose ku bizera. Ndayiboherereza nyuma y’ubu butumwa.

 

Muri iki gitondo Imana yongeye kutwigisha amagambo ari muri Daniel umugabo wakunzwe n’Imana igice cya gatanu cyose ariko ndibanda ku mirongo ikurikira gusa kubera umwanya wo kwandika

Dan 5:10-12. “Nyuma Umwamikazi yumvise amagambo y’Umwami n’abatware be,yinjira mu nzu y’ibirori bariragamo, aravuga ati, nyagasani nyaguhoraho, ibyo utekereza bye kuguhagarika umutima ngo mu maso hawe hahinduke ukundi, kuko mu gihugu cyawe harimo umugabo urimo umwuka  w’Imana zera ndetse ku ngoma ya so yabonekagamo n’umucyo no kwitegereza n’ubwenge buhwanye n’ubwenge bw’Imana kandi so Nebukadinezari yamugize umutware w’abakonikoni n’abapfumu n’abakaludaya n’abacunnyi, kuko muri uwo umugabo Daniyeli uwo umwami yahimbye Beluteshazari habonetsemo umwuka mwiza no kwitegereza, yashoboraga gusobanura inzozi no guhishura ibihishwe, no guhangura ibyananiranye. Nuko bahamagare Daniyeli aze asobanure impamvu yabyo”.  

 

Uyu mugore yabwiye umwami aya amagambo nyuma yuko abona ko yahangayitse cyane , Imana yari imaze kumwereka amagambo adasobanukiwe  kandi ibimwerekesha intoki zandika ku rusika.  Yari yacyuje inkera, ngo banezerewe cyane n’abatware be, buzurwa n’umurengwe batumiza ibikoresho bya zahabu n’ifeza byari byaranyazwe mu rusengero I Yerusalemu babinyweramo vino ngo barangije baramya ibigirwamana byabo, Imana irabarakarira, umwami Belushazari agiye kubona abona intoki zandika Ku rusika amagambo “mene mene Tekeli Ufarisini”.

 

Umwami ngo yatumije abitwa abahanga bose habura uwasobanura ibyo, abakarudaya n’abacunnyi be babura icyo bamumarira ngo arahangayika cyane. 

 

Icyanejeje cyane nuko abitwaga ko bakomeye bagaragaye nk’abadashoboye imbere y’umukozi w’Imana Daniyeli wayineje akandika amateka mu mutima w’Imana. Yari yarayubashye, yarayikiranukiye imurinda ku ngoma ya Nebukadinezari, no ku ngoma ya Belushazari yari ikiri Imana ye. Ubuntu bwayo butarondoreka bwari bukimurimo. Umwamikazi yari yaramubonyeho itandukaniro kandi Imana yashatse kumukoresha ngo n’umwami amenye ko muri icyo gihugu hari umuntu ufite umwuka w’Imana nzima itari ibigirwamana baramyaga ubasha gusobanura ibyo ab’isi n’Imana zabo batamenya, abisobanura ashize amanga nubwo bwari ubuhanuzi bukomeye. 

 

Uku kudahinduka kwa Daniyeli  nshuti z’Imana, niko dusabwa muri ibi bihe, kwizera kwacu ntikugomba kujyana n’ibihe, kugomba gushingira ku Mana yacu idahinduka. Ntitugomba gutezuka ngo kuko ibihe byahindutse. Imana yacu izahora ari Imana icyo ivuze iragikora naho byatinda. Uwakijijwe aho atandukanira n’abandi nuko adahindagurika. Kwizera kwe ahubwo gukomerera mu bikomeye. Satani araduhiga mubimenye, ntahwema arashaka abo yisasira kandi adutegera mu bikomeye, yatunyeganyeza akumva byoroshye, yongera imbaraga kugeza adushyiguye. Oya ibi ntibizabaho mw’Izina rya Yesu. Mushikame, tumere nka Daniyeli, kwizera kwacu tugukomeze nkuko Yobu yavuze tumere nka wa murinzi muri ya ndirimbo nababwiye. Nituba dutyo nkuko Imana ishaka, izatwishimira, izadukoresha iby’ubutwari naho ibihe byaba bikomeye bite. Isi izamenya ko twizeye Imana nya Mana kandi nayo izihesha icyubahiro mu kubaho kwacu. Isi n’ibyayo, n’abayo bizagaragara nk’ubusa imbere y’abana b’Imana. Ndabashishikariza gukomera mu kwizera, gushakashaka ibinezeza Imana yacu akaba aribyo dukora , tukayiha ubugingo bwacu ngo tube ibikoresha bizima byo kuyihesha icyubahiro, ibindi tubiyirekere izabyikorera. tuzakomereza ejo ku byo Imana yabwiye Belushazari. Imana Data ibahe amahoro n’umugisha. Bishop Gahima.

 

[4/15, 5:03 AM]

https://youtu.be/AZzEeAhEyfU

 

 

[4/16, 3:16 AM]

 

Mwaramutse benedata, Imana ishimwe ko ikomeje kuturinda mu miryango yacu ndetse  nk’Itorero ryayo, turayishimira uburinzi bwayo bukomeye muri ibi bihe bitoroshye. Icyubahiro cyose n’igitinyiro cyose bibe ibyayo iteka. Nkuko nabasezeranije ejo, reka dusubire Ku ihishurwa ryabaye ku mwami Belushazari muri Daniyeli 5:13-30. Muze kuhisomera 

 

Muri iki gice, murasanga Daniyeli azanwa imbere y’umwami, akimubona yamubonaga nk’usuzuguwe, aramubwira ngo “numvise bakuvuga ko umwuka w’Imana ari muri wowe kandi ko umucyo wo kwitegereza n’ubwenge bwiza bikubonekaho…” Nubwo Belushazari yari Umwami, Daniyeli akaba insuzugurwa, Imana yari yamaze guha Daniyeli ubutware burenze kure ubw’umwami Belushazari. Yari afite ubumana muri we, bumuhesha ubutwari hejuru y’umwami wari wamaze kugaragara nk’ubusa  imbere y’Imana isumba byose. Aho gushaka uwahaye  Daniyeli ubwenge n’uwo mwuka mwiza wo kwitegereza, yashatse Daniyeli n’abakonikoni be. Isomo dukura muri iyi nyigisho riri muri izi ngingo zikurikira:

1. Wubaha Imana ikakwishimira, nayo ikakubahisha nkuko yubahishije Daniyeli kandi urayisuzugura ukikururira umujinya wayo. Belushazari aho guca bugufi yagiye mu bwibone, asuzugura Imana isumba byose, aramya ibigirwamana, atatira ibyerejwe gukoreshwa mu rusengero ngo babinyweramo. Ibi byatumye Imana imurakarira ishyira iherezo ku butware bwe. Iryo joro Daniyeli yamusobanuriye ibyanditswe, yaraye yishwe, ubwami bwe buhabwa Dariyo w’umumedi. Twitonde twe kwishyira hejuru nshuti z’Imana ahubwo umugisha Imana iduhaye ujye urushaho kuducisha bugufi ngo Icyubahiro kirusheho kuba icy’Imana. 
2. Tujye twigira Ku mateka. Belushazari yari akwiye kuba yarigiye ku byabaye kuri se. Nebukadinezari yari yarabaye umwami ukomeye cyane ageza igihe yiyita umwami w’abami, Imana imucusha bugufi, amara imyaka irindwi aba mw’ishyamba arishanya n’inyamaswa, atondwaho n’ikime cy’ijuru cya mugitondo. Belushazari yari akwiye kuba umwami wamenye imbaraga z’Imana , ayubaha kandi ayishimira ko munda y’uwo Imana yari yarahannye havuyemo umwami. Wowe amateka yawe akwigisha iki, mbese iyo wibutse imirimo y’Imana ubigenza ute? Jyewe  ncishwa bugufi uko mbonye umugisha wo kwibutswa imirimo y’Imana mu mateka yange. Daniyeli we, uko yazamurwaga, niko yarushagaho kubona gukiranuka kw’Imana no kubona gukomera kwayo hejuru y’abami n’abatware b’isi ndetse nawe ubwe. Gukiranuka kw’Imana yacu guhoraho.
3. Mene: nkuko Imana yeretse Belushazari, natwe ijya ibara iminsi yacu ikareba ibyo dukora. Dawidi yarasenze ati, “Mana utwigishe kubara iminsi yacu uburyo butuma  dutunga imitima y’ubwenge” Zab 90:12. Umunsi Imana yatwigishije kumenya agaciro k’ibyo dukora buri munsi, tuzaba dufite imitima y’ubwenge. Umwami Belushazari ntiyagize aya mahirwe ahubwo yarasahuranijwe yifuza ibimunezeza. Icyampa ukiga kubara buri kintu ukora wifuza kunezeza Imana. Nibwo buryo bwonyine buturemera kandi bugasohoza isezerano ryiza kuri twe.
4. Teleli: Iri jambo risobanurwa ngo washyizwe ku gipimo ugaragara ko udashyitse. Ese  twe turashyitse? Nshuti twe ntituri nka Belushazari, turacyafite igihe cyo gutunganya ibidatunganye bityo tukagaragara nk’abashyitse imbere y’Imana. Nukuri ibi nabitekereje, ntekereza benshi bagenda batuvamo, ese koko, bagenda ibyabo bimeze bite? Imana idufashe.

 

Mbabajije ibibazo byinshi ariko ukuri nuko ibi Imana ibitwigishiriza kugirango ibone uko  idutunganya. Tuve mu rwenya, tuve mu kudamarara, dushakane Imana umwete dore itweretse byinshi bitubera amasomo. N’iki cyorezo ubwacyo ni isomo rikomeye. Umunyamugisha azigiramo amasomo menshi. Ndabasengengera mwese ngo Imana ikomeze kubana namwe kandi ikomeze kubiyereka kandi ngo twese tuve muri ibi bihe tumeze nka Daniyeli. Imana yacu isumba byose ibahe amahoro n’umugisha. Bishop Gahima.

 

 

[4/17, 6:28 AM]

 

Mwaramutse benedata, nshima Imana cyane iyo mbonye hari benedata baba bazindutse bakaba imbere y’Imana muri ya masaha y’ibitotsi birengeye. Imana ijye ikomeza kureba umuhate wanyu kandi rwose muhumure si uw’ubusa ku Mwami wacu. 

Nkomeje gushima Imana cyane uburyo ibanye natwe muri uru rugendo rwo mu bigaragara nk’ubutayu  kuko idutungishije ijambo ryayo rizima kandi iduhaye imbaraga nukuri. Muhumure ntituzagwa isari dufite Yesu. Hari invugo abakristo bakunda kuvuga jye ntemera ngo “nitutagwa isari tuzasarura”- oya tuzasarura mw’Izina rya Yesu waduhaye umurimo. Nta kugwa isari birimo kuko uwatangiye umurimo mwiza muri twe niwe uzatuma dusarura kuko nta kimurusha imbaraga. Abatinya isari ni abatizera. 

 

Hari indirimbo naraye numva ndirimba nezerewe nubu nyikangukiyemo numva  koko niyo nari nkwiye kuririmba mu bihe nk’ibi. Ni indirimbo ya 142 mu ndirimbo zo gushimisha Imana. Aha,  Umuririmbyi yari yanyuzwe n’ubwiza bwa Yesu ati ‘untware ungire imbata yawe’. Nukuri imbata ya Yesu iruta igikomangoma kibayeho kubwacyo. Ndavuga mu rurimi rw’ubwami bw’Imana. 

 

“Arababwira ati, ” nugira umwete wo kumvira Uwiteka Imana yawe, ugakora ibitunganye mu maso yayo, ukumvira amategeko yayo, ukitondera ibyo yategetse byose, nta ndwara nzaguteza mu zo nteje Abanyegiputa kuko ari jye ugukiza indwara” Kuva 15:26. Aya magambo Imana yayabwiye Mose ari kumwe n’abisirayeli ahitwa i Mara nawe ayabwira abisirayeli. Bari bagize kwitotomba gukomeye, bamaze iminsi itatu batabona amazi kandi bari mu butayu. Imana yari imaze gukoresha Mose ikindi gitangaza ahinduye amazi y’ I Mara yashariraga maze ngo gusharira birashira aba meza. 

 

Bamaze kunywa amazi  banezerewe, Bakabaye babonye ubushobozi bw’Imana bukomeye ndetse n’urukundo rwayo rukomeye, Mose yababwiye ibanga rikomeye rituma barushaho gukomerera mu Mwami kandi natwe iryo jambo riradukwiye iki gitondo. Nukuri jye uko numva narizeye, nta ndwara, naho yaba ikomeye ite yananira Imana. Nta ngabo, naho zaba zikomeye zite, zananira Imana, nta situation, naho yaba ikomeye ite, Imana itahindura. Dupfa gusa kuba tunezeza Imana yacu, itwishimiye kugeza ubwo ibyacu ibigira ibyayo. Kandi mbabwire nshuti nziza, iyo twageze kuri urwo rwego, imigambi yacu, intambara zacu, umunezero wacu etc tukabirekurira Imana ngo ibikore uko ishaka  bityo tukagendera mu bushake bwayo, nta na kimwe itakora. Nabonye ibanga ryo kubaho ndetse kubaho neza, ibanga ry’amahoro n’umunezero bibonekera muri Kristo gusa. Imana yabwiye ab’Israyeli iti,  “Erega nzi ibyo nibwira nzabagirira, ni amahoro si ibibi kugirango mbareme umutima w’ibyo muzabona hanyuma..” Yer 29:11. 

 

Iki gitondo ndabasaba ngo dutekereze mu mitima yacu, igihe twishakashakiyeho ibyo tubona bikwiye ku bwacu kirangana iki? Mbese niko tubigeraho uko tubishaka? Jye mbona akenshi iyo nshyize umutima  wange wose ku kintu akenshi bitagenda uko nshaka cyangwa byanaba nkasanga ntibinejeje nkuko ibyo Imana inkoreye bijya binezeza. Mureke duharire Umwami wacu imigambi yacu, ku ruhande rwacu tugambirire kumwubaha no kugendera mu mategeko ye, tubane nawe uburyo atwishimira, ntacyo tuzamuburana. Nta ndwara zikomeye zizatugeraho, nta kizadukuraho amahoro, azatubera byose muri byose. Amahoro n’Umugisha bitangwa n’Imana Data wa twese bibane namwe. Bishop Gahima.

 

 

[4/18, 6:20 AM]

 

Nshuti bavandimwe Yesu ashimwe! Mw’Isi yacu no mw’ijuru, ntazina nk’irya Yesu. Nta n’irindi ryaduhumuriza nk’iry’uwatubambiwe. Uwo mwami turamushimye cyane muri iki gitondo.

 

Uyu munsi numvise nifuza kubahumuriza cyane kubera ko nange Imana yampumurije. Iyi si turimo yuzuye umuruho n’amaganya, icyo dukeneye cyose siko tukibona. Akenshi muri uru rugendo tunyura mu misozi no mu mataba kandi aho hose niko harushya umutima. Gusa iyo tugndanye na Yesu hose tuhanyura hatworoheye. Kugira Yesu nk’ Umwami wacu ntibizabuza ko duca mu bikomeye ariko icyo abamufite barusha abandi, nuko iyo tugendana nawe aho hatatworoheye, adukomeza muri byose ndetse yabona ko tugeze aho tutabasha, akatwikorera imitwaro yacu. 

 

Muri Zab 23 Dawidi yaravuze ati “Uwiteka niwe mwungeri wange sinzakena”. Kudakena si uguhorana amafaranga, ahubwo ni uguhorana igusubizo cy’ibyo amafaranga akenerwaho. Hari ubwo Umwami wacu abona ko icyo dukeneye atari ibyo dusaba akaduha ibyo we abona dukeneye atitaye ku masengesho yacu, kandi ibyo biratunyura cyane kuruta n’ibyo twifuzaga iyo ahumuye imirima yacu tukabisobanukirwa. 

 

Ku murongo wa 4a w’iyo Zaburi, haravuga ngo, “naho nanyura mu gikombe cy’igicucu cy’urupfu, sinzatinya ikibi cyose kuko ndi kumwe nawe”. Hari igihe tudamarara tugira ngo isi iraryoshye, iyo Imana idukunda, iradusanga mu nzozi ikatwereka isi turimo, ikatwereka tunyura mu nzira zigoranye, duca mu bihanamanga, tuzamuka imisozi  etc kugirango tube maso tutibeshya tukadamarara. Ubundi tukanyura mu bikomeye cyane tugahagarika umutima akadusanga mu nzozi akatwereka turi ahantu heza, tunezerewe, turi kumwe n’umuntu tutazi udukemurira ibibazo. Ibi, Uwiteka abikorera kugirango tumenye ko muri ibyo byose turi kumwe nawe kandi ko  kugendana nawe birenze kugendana n’ingabo ibihumbi. Nitumwizera azadukorera iby’ubutwari. Ndabifuriza kugendana n’Uwiteka.

 

Ku murongo wa 4b, havuga ngo “inshyimbo yawe n’inkoni yawe nibyo bimpumuriza”. Nshuti reka twemere ubushake bw’Uwiteka mu bihe turimo. Nta bitungura Imana yacu. Ibyo tunyuramo, turi kumwe nawe, afite ibushobozi bwo gukoresha ibihe turimo kubw’ineza yacu. Naho yadukubita akanyafu, ntitukivovote kuko abifitiye impamvu kandi ikibivamo ni cyiza kuri twe nubwo tutabibonesha amaso yacu. Aturengeresha inkoni ye iyo ubushobozi bwacu burangiye. Icyubahiro kibe icye iteka.

 

Nsoza, ndabasaba kujya dusengera abayobozi bacu no kububaha, baradukunda, bakoze ibishoboka muri ibi bihe ngo Abanyarwanda tutarwara turi benshi, inzego z’umutekano n’abayobozi b’inzego zitwegereye ntibagoheka ku bwacu, Imana ibahe umugisha. Natwe mureke twubahirize inama batugira, tugume mu mago, twirinde icyatuma turwara. Imana yacu ibakomeze, ibahumurize kandi tugire kwihangana nubwo kuguma mu rugo byongerewe igihe, ntiducike intege. Umugisha w’Imana muri mwese. Bishop Gahima.

 

 

[4/19, 5:54 AM]

 

Mwaramutse nshuti bakundwa! Imana yacu ishimwe cyane ko iduhaye undi munsi wo kubaho ndetse umunsi mwiza yadushyiriyeho ngo tujye tubana nayo kurusha Indi minsi. Ubundi Ku nshuti z’Imana, nta munsi mwiza nk’umunsi Imana yadushyiriyeho kuyisenga. Ndizera ko amateraniro yo mu miryango uyu munsi akomeza. 

 

Iki gitondo, ntangajwe na Yesu mu magambo anyigishije, namwe ndabasengera ngo muyasome mufashwe nayo. Matayo 14:22-36. Iyi nyigisho ni ndende sinabasha kuyandika yose, ndayibabwira mu ncamake muze kuyisoma yose. Yesu yari amaze kugaburira abantu 5000, abigishwa be babibonye nk’igitangaza kidasanzwe batatekerezaga ndetse batumvaga mbere,  dore ko bari bafite amafi 2 n’imitsima 5. Bakibaza ibyo, ngo Yesu abahatira kujya mu bwato ngo bambuke inyanja bamubanzirize i Betsayida, noneho we abanze asezerere abantu ndetse abone n’umwanya wo gusenga. Kuri Yesu ibi byari ibisanzwe ariko ku bigishwa, ntibyari byoroshye.

1. Kugenda bonyine batari kumwe na Yesu byari ikibazo kuko yari byose Ku bigishwa be.
2. Bibazaga icyo bari bukore Betsayida batari kumwe na Yesu ntibakibone
3. Barebaga umuhengeri imbere bagatinya. Ibi byose nibyo byatumye batinya kugenda ngo maze Yesu arabahata.

 

Yesu amaze gusenga, asanga ari ngombwa ko abasanga bakiri mu nyanja kubera ko umuhengeri wari mwinshi kandi yari azi ko abigishwa be ari abanyantege nke kandi ko bagize ubwoba cyane, akwiye kubakiza ndetse no kubahumuriza. Ngo yagendesheje amaguru hejuru y’amazi arabasanga. Dore uko byari bimeze

1. Ngo bari bafite ubwoba, bataka cyane kubera umuhengeri
2. Babonye Yesu bwo byarushijeho kubatera ubwoba kuko bibazaga ko ari umuzimu, noneho umuzimu kubafatanya n’umuhengeri byari ibindi. Bagize ubwoba cyane
3. Yesu yarabibonye yihutira kubahumuriza ati, “nimuhumure nijyewe mwitinya”

4.Bumvishije ijwi rya Yesu, bagarura umutima, Petero  asaba Yesu kumwemerera kugendesha amaguru hejuru y’amazi, gusa Umuyaga wari ukiri mwinshi. Yesu aramwemerera.

 

Inyigisho iri aha nshuti ngirango uzirikane, Petero n’abigishwa bagenzi be bari bazi Yesu nk’umunyambaraga ariko bari batarakura mu buryo bw’umwuka. Kwizera kwabo kwari gushingiye gusa ku byo babonaga Yesu akora. Niyo mpamvu bahoraga bashidikanya. Twe twagiriwe Ubuntu bwo guhabwa umufasha udushoboza kumenya uko twitwara mu bihe binyuranye. Uwo Mwuka  Wera niwe mbaraga z’abizera kandi igihe cyose dutabaje izina rya Yesu, turatabarwa kuko ahorana natwe. 

 

Petero ngo amaze kumenya ko ari Yesu uje aho bari, yumvishije imbaraga muri Yesu zamushoboza nawe kugendera hejuru y’amazi, byarashobokaga pe, ariko nubwo yari yizeye Yesu umuhamagaye, amaso ye yagumye kureba ubukana bw’umuyaga ngo aratinya cyane ndetse atangira kurengerwa. Abizera bakwiye guhanga amaso Yesu tukizera ijambo rye tutitaye ku bindi tureba. Nukuri Yesu arahagije ku bamwizera, uko ibihe byaba bimeze kose. Hari Korali ijya ihimbaza ngo “nta misozi, nta n’inyanja, nta bihe, byabuza umugambi w’Imana kuzura. Muri uko gushidikanya,  Yesu yafashe ukuboko kwa Petero ahagarika wa Muyaga ngo Abigishwa babibonye baramuramya bahamya koko ko ari umwana w’Imana.

 

Nshuti muvandimwe, muri ibi bihe turimo ndetse na nyuma y’ibi wenda hazaza n’ibindi, icyo uyu munsi dusabwa ni ugushikama mu kwizera kwacu. Yesu ntakora gusa iyo amaso yacu amureba, ahubwo imbaraga ze zikorera muri twe. Mu ndirimbo ya 28/2 tujya turirimba ngo Kwa Yesu dufite ubutware, dufite n’ubushobozi iyo twizeye amagambo ye uko yayatubwiye…Turasabwa kongera ibihe byo gusenga kuko niho duhererwa amasezerano ndetse n’amagambo y’inkomezi. Pawulo ati, ” nuko twegere intebe y’ubuntu tudatinya, kugirango tubabarirwe, tubone ubuntu bwo kudutabara mu gihe gikwiriye.” Abaheb 4:16.

Nsoza, ndashimira Umwami Yesu utureresheje imbaraga z’umwuka zitumye tubasha guhagarara dushikamye mu buntu bwe muri ibi bihe bikomeye kwizera kwa benshi kuri ku munzani. Imana yacu idukomeze, Ihe itorero ubushizi bw’amanga no gushikama gukomeye muri ibi bihe. Kuko turi mu bihe umukiranutsi abeshwaho no kwizera (Abaheb 10:38). Imana ibakomeze kandi ibahe umugisha. Bishop Gahima.

 

 

[4/20, 8:51 AM]

 

Yesu ashimwe benedata, Ubuntu n’amahoro bitangwa n’Imana Data wa  twese bibane namwe. Iki gitondo nongeye kugaruka Ku kwegera Imana uburyo butuma itumenya, iturera ikadukuza, ikaduhindura abakomeye imbere y’isi na Satani. Atari abakomeye uburyo ab’isi babyita ahubwo abakomeye batanyeganyezwa n’ibije byose. 

 

Mu kwegera Imana, ndavuga kubana n’Imana mu buryo buhindura kandi nta kindi  cyaduhindura usibye ibyo Imana itubwira mw’Ijambo ryayo haba muri Bibiliya cyangwa, mu gusenga cyangwa mu bundi buryo umuntu avugana n’Imana yaba mu nzozi cyangwa imwisangiye mu buryo bwayo bwihariye.

 

Yakobo 1: 22-23:  “Ariko rero mujye mukora iby’iryo jambo, atari ugupfa kuryumva gusa mwishuka, kuko uwumva ijambo gusa ntakore ibyaryo, ameze nk’umuntu urebeye mu maso he mu ndorerwamo, amaze kwireba akagenda, uwo mwanya akiyibagirwa uko asa”.  Aya magambo nayasomye nshima Imana kuko aratubwira ukuri pe. Twe abavugabutumwa ibi tujya tubibona. Hari igihe tuvuga ubutumwa abantu bakatubwira uburyo bafashijwe butandukanye. Hari abafashwa n’ingero z’imigani twatanze mu nyigisho, hari abafashwa n’uturirimbo umuvugabutumwa akoresha, hari abafashwa n’amarangamutima tuvugana ubutumwa, hari abareba uko twambaye, hari n’abafashwa n’abo turibo, ugasanga niba atari Bishop cyangwa wenda Pastori , ubutumwa ntacyo bumubwiye. Nshuti z’mana, Yakobo aratwigisha ko ibi bitadufasha. Niba tugomba gukura mu mwuka, nta kindi dukwiye kureba cyangwa kwitaho. Ijambo ry’Imana niryo riduhindura abakwiriye imbere yImana. Kandi naryo riduhindura iyi turyumva tukaryumvira ibihe byose. 

 

Muri ibi bihe turimo, Imana ingiriye neza rwose. Tubanye n’abana cyane kuruta ibindi bihe. Tugirana umwanya wo gusengana uhagije, umwanya wo kuganira uhagije kuburyo buri umwe muzi haba imbaraga ze cyangwa intege nke ze kandi nabo bagize umwanya uhagije wo kumenya ibyo twe ababyeyi babo babifuzaho. Batwigiyeho byinshi kuburyo natwe tubyiboneye muri iki gihe cyo kuguma murugo. Ariko ibi byose tubishobojwe nuko twagize umwanya uhagije wo kubana nabo no kubafasha aho tubona bakeneye imbaraga z’umubyeyi.

 

Ntekereza ko ari muri urwo rwego dukwiye kubana n’Imana yacu. Mu kuyegera tukayiha umwanya wacu wose, tukayisaba ubwenge no guhishurirwa, tukayereka intege nke zacu,  izadufashisha ijambo riduhindura  Kandi nitutinangira Imitima, iryo jambo rizaturera ridukuze. Niba hari ibyago bibaho, ni ukubaho nk’inshoberwe uri umutware. Iyo bimeze bityo, isi ikogeraho uburimiro, satani agukoresha ibyo ashaka byose kuko nawe ntuba uzi icyo uri cyo. Mu minsi ishize, hari Umupastori wacu wambwiye ngo aherutse guhura n’umukristo ajya guhinga ku cyumweru, amubajije impamvu, umukristo ati “se ntuzi ko tutemerewe kujya gusenga Ku cyumweru?”. Uwo azi ko Imana iba mu rusengero. Muri make mu gihe atagiye mu rusengero nta Mana ihari. Hari ahantu nagiye gusengera Ku cyumweru imvura yaguye , abakristo ntibaza gusenga ngo kuko imvura yaguye. Ubu she koko Imana ikora nkuko twe tugenza, twabaho. Nyamara, tubeshwaho n’imbabazi z’Imana kandi zo ntizishira.

Bene data, muri aka gakiza, turasabwa gukura, tukava mu bwana, Kristo yaravuze ngo abasenga Imana bayisenga mu muri no mu mwuka. Ntituri muri bya bihe  by’abigishwa ba Yesu batari bagahawe Umwuka Wera, twe twaramuhawe, kandi Imana itwiyerekera mu ntambara zacu ngo ituremera imbaraga zo kuyizera. 

 

Icyo mbifuzaho nk’itorero muri uru rugamba rwo guharanira gukiranuka twitegura kugaruka k’Umwami wacu, ni uguhama , tugakomerera mw’ijambo, tukagerageza gukora ibyo Imana ishaka. Kandi ukuri nuko , uko tubigerageza, Imana yacu ntitureka ngo turwane n’ibyo tudashobora, iradusanga, ikadufata ukuboko ikadushoboza nkuko umubyeyi afasha umwanya iyo yiga kugenda. Imana twizeye izadufasha muhumure. Nkuko ikomeje kuturinda iki cyorezo ndetse n’ibindi bibazo bikomeye, izakomeza nk’Imana ishobora byose kuturwanirira. Twe gusa dukomeze duhame mu kwizera kwacu no kuyubaha, tuyirekere ibindi. Imana ibahe umugisha. Bishop Gahima.

 

 

 

 

 

[4/22, 5:47 AM]

 

Nshuti z’Imana mwaramutse? Yesu ashimwe cyane kubw’ubuntu bwe n’imbabazi ze bitumye dukomeje kuba mu mahoro. Nshimye Imana cyane yabanye nange iri joro ryose kandi yanejeje ndetse irananyigisha. Nimubishobora muze kuririmba indirimbo ya 190, nubwo nsanzwe nyikunda ariko yambereye impano y’Imana muri iri joro. Muri iki gitondo, numvaga nifuza cyane  kumenya  ibanga ryatuma ngendana ubutware hejuru y’ibyo duhura nabyo muri uru rugendo rwo gukiranuka, Imana impa aya magambo ndyamye. Reka  tuyaganireho. Kuva 23:20-27.”Dore ndatuma marayika imbere yawe, akurindire mu nzira, akujyane aho nakwiteguriye. mumwitondeho, mumwumvire ntimukamugomere kuko atazababarira ibicumuro byanyu kuko izina ryange riri muri we. Ariko numwumvira by’ukuri, ugakora ibyo nzavuga byose, Nange nzaba umwanzi w’abanzi bawe, n’umubisha w’ababisha bawe,  kuko marayika wange azakujya imbere akakujyana mu bamori n’Abaheti, n’Abaferizi n’Abanyakanani, n’Abahivi n’abayebusi maze nkabarimbura…kandi muzakorere Uwiteka Imana yanyu, nayo izaha umugisha umutsima wawe n’amazi yawe kandi nzakura indwara hagati muri mwe”. 

 

Imana ishimwe kuko aya magambo yaje antunguye ubwo jye natekerezaka ku yandi kandi rwose aruzuye pe. Muri iki gice ndetse n’ibikibanziriza, Mose n’ubwoko bw’ab’Isirayeli bari bamaze guhabwa amategeko menshi azatuma babasha kugendera imbere y’Imana neza bakabasha kugera mu gihugu Imana yari yarabasezeranije. Nuko aya magambo dusomye yo, Imana yashakaga guhamiriza Mose umukozi wayo ko ibanga ryo kunesha kwabo, kunezerwa kwabo, ubuzima buzira umuze bwabo ndetse n’ubutsinzi muri urwo rugendo bari barimo bizashingira ku buryo bazubaha Imana yabo. Icyo Imana impishuriye nifuje ko nawe wamenya, nuko mbere yuko bagera I Kanani bagombaga guca mu bihugu by’Abamori, Abaheti, Abaferizi, Abahivi…  Kandi aba bose bari biteguye kubarwanya no kubananiza kugera  mu gihugu cy’isezerano nkuko Umuririmbyi w’indirimbo ya 105/2 avuga ati , “nyura mu misozi, nyura mu mataba, aho hose niko harushya umutima…” , ibiturwanya mu rugendo ni byinshi. Inkuru nziza uyu munsi nshuti, nuko nubwo aba bose bari biteguye kurwanya a’bisirayeli, Marayika w’Uwiteka yari kumwe nabo  kandi Imana yari yamaze kubaha ubutware hejuru y’ibibarwanya byose yaba abanzi babo b’ubwoko bundi ndetse n’Indwara. Abamori n’abaheti, n’abahivi n’abayebusi mu buzima bwacu ni benshi. Ni ubukene, ni indwara, ni abantu baturwanya, ni Satani udashaka ko twakira ibyo Uwiteka yaduhaye ariko, iki gitondo ndifuza ko umenya ko hari Malayika washyizwe imbere yawe. Icyo usabwa gusa ni ibintu bibiri *kumwitondaho* no *kumwumvira* kandi Imana y’Imbabazi ishimwe kuko iradusezeranira yuko nidukora dutyo, izaba umwanzi w’abanzi bacu n’umubisha w’ababisha bacu, muri macye izirwanira urugamba rwose. Iki nicyo mbifurije uyu munsi ngo muzirikane icyo Imana idushakaho, mukigenderemo kuko nibwo butsinzi.

 

Icya kabiri, ku murongo wa 24, turihanangirizwa ko Imana nimara kutuneshereza, ntituzadamarare ngo dutegekwe n’ibyiza yaduhaye, tugire umurengwe twibagirwe Imana. Kugira amafaranga cyangwa ubundi butunzi cyangwa umunezero usesuye, ntibikwiye kutwibagiza Imana yacu. Ahubwo uko tubireba, dukwiye kujya tuzirikana gushima ndetse no kurushaho gushaka mu maso h’Imana kugirango duhore tuyinezeza nayo ikomeze kutuzirikana. Ndabizi ntashidikanya ko ibi bihe bikomeye bizashira tugire umunezero, abafite ubukene, ubushomeri, indwara byose bizashira, nyamuneka ntimuzadamarare ngo muvuge muri twarize, twakoresheje imbaraga zacu, turakomeye, ahubwo muzarusheho gucishwa bugufi mutazababaza Imana bikabaviramo guhanwa. Tuzahore tuzirikana ko Imana ibiduhera kugira ngo ituremere ubuhamya n’imbaraga zihoraho mu kwizera kwacu.

Imana ibahe umugisha n’amahoro. Bishop Gahima.

 

 

[4/22, 5:47 AM]

 

Nshuti z’Imana mwaramutse? Yesu ashimwe cyane kubw’ubuntu bwe n’imbabazi ze bitumye dukomeje kuba mu mahoro. Nshimye Imana cyane yabanye nange iri joro ryose kandi yanejeje ndetse irananyigisha. Nimubishobora muze kuririmba indirimbo ya 190, nubwo nsanzwe nyikunda ariko yambereye impano y’Imana muri iri joro. Muri iki gitondo, numvaga nifuza cyane  kumenya  ibanga ryatuma ngendana ubutware hejuru y’ibyo duhura nabyo muri uru rugendo rwo gukiranuka, Imana impa aya magambo ndyamye. Reka  tuyaganireho. Kuva 23:20-27.”Dore ndatuma marayika imbere yawe, akurindire mu nzira, akujyane aho nakwiteguriye. mumwitondeho, mumwumvire ntimukamugomere kuko atazababarira ibicumuro byanyu kuko izina ryange riri muri we. Ariko numwumvira by’ukuri, ugakora ibyo nzavuga byose, Nange nzaba umwanzi w’abanzi bawe, n’umubisha w’ababisha bawe,  kuko marayika wange azakujya imbere akakujyana mu bamori n’Abaheti, n’Abaferizi n’Abanyakanani, n’Abahivi n’abayebusi maze nkabarimbura…kandi muzakorere Uwiteka Imana yanyu, nayo izaha umugisha umutsima wawe n’amazi yawe kandi nzakura indwara hagati muri mwe”. 

 

Imana ishimwe kuko aya magambo yaje antunguye ubwo jye natekerezaka ku yandi kandi rwose aruzuye pe. Muri iki gice ndetse n’ibikibanziriza, Mose n’ubwoko bw’ab’Isirayeli bari bamaze guhabwa amategeko menshi azatuma babasha kugendera imbere y’Imana neza bakabasha kugera mu gihugu Imana yari yarabasezeranije. Nuko aya magambo dusomye yo, Imana yashakaga guhamiriza Mose umukozi wayo ko ibanga ryo kunesha kwabo, kunezerwa kwabo, ubuzima buzira umuze bwabo ndetse n’ubutsinzi muri urwo rugendo bari barimo bizashingira ku buryo bazubaha Imana yabo. Icyo Imana impishuriye nifuje ko nawe wamenya, nuko mbere yuko bagera I Kanani bagombaga guca mu bihugu by’Abamori, Abaheti, Abaferizi, Abahivi…  Kandi aba bose bari biteguye kubarwanya no kubananiza kugera  mu gihugu cy’isezerano nkuko Umuririmbyi w’indirimbo ya 105/2 avuga ati , “nyura mu misozi, nyura mu mataba, aho hose niko harushya umutima…” , ibiturwanya mu rugendo ni byinshi. Inkuru nziza uyu munsi nshuti, nuko nubwo aba bose bari biteguye kurwanya a’bisirayeli, Marayika w’Uwiteka yari kumwe nabo  kandi Imana yari yamaze kubaha ubutware hejuru y’ibibarwanya byose yaba abanzi babo b’ubwoko bundi ndetse n’Indwara. Abamori n’abaheti, n’abahivi n’abayebusi mu buzima bwacu ni benshi. Ni ubukene, ni indwara, ni abantu baturwanya, ni Satani udashaka ko twakira ibyo Uwiteka yaduhaye ariko, iki gitondo ndifuza ko umenya ko hari Malayika washyizwe imbere yawe. Icyo usabwa gusa ni ibintu bibiri *kumwitondaho* no *kumwumvira* kandi Imana y’Imbabazi ishimwe kuko iradusezeranira yuko nidukora dutyo, izaba umwanzi w’abanzi bacu n’umubisha w’ababisha bacu, muri macye izirwanira urugamba rwose. Iki nicyo mbifurije uyu munsi ngo muzirikane icyo Imana idushakaho, mukigenderemo kuko nibwo butsinzi.

 

Icya kabiri, ku murongo wa 24, turihanangirizwa ko Imana nimara kutuneshereza, ntituzadamarare ngo dutegekwe n’ibyiza yaduhaye, tugire umurengwe twibagirwe Imana. Kugira amafaranga cyangwa ubundi butunzi cyangwa umunezero usesuye, ntibikwiye kutwibagiza Imana yacu. Ahubwo uko tubireba, dukwiye kujya tuzirikana gushima ndetse no kurushaho gushaka mu maso h’Imana kugirango duhore tuyinezeza nayo ikomeze kutuzirikana. Ndabizi ntashidikanya ko ibi bihe bikomeye bizashira tugire umunezero, abafite ubukene, ubushomeri, indwara byose bizashira, nyamuneka ntimuzadamarare ngo muvuge muri twarize, twakoresheje imbaraga zacu, turakomeye, ahubwo muzarusheho gucishwa bugufi mutazababaza Imana bikabaviramo guhanwa. Tuzahore tuzirikana ko Imana ibiduhera kugira ngo ituremere ubuhamya n’imbaraga zihoraho mu kwizera kwacu.

Imana ibahe umugisha n’amahoro. Bishop Gahima.

 

 

[4/23, 7:33 AM]

 

Yesu ashimwe cyane benedata, maze iminsi nibaza nti “ese umuntu yabera umugisha abana be gute uburyo uwo umugisha  ukomereza  mu bazamukomokaho  bose” .Dore amagambo Imana impaye muri iki gitondo tuyasangire. Gutegeka kwa Kabiri 4: 7-9. “Mbese hari ishyanga rikomeye rifite Imana iriri hafi nkuko Uwiteka Imana yacu ituba hafi, iyo tuyambaje? Kandi ni shyanga rikomeye ki rifite amategeko n’amateka atunganye ahwanye n’aya mategeko mbashyira imbere uyu munsi? Wirinde gusa, ugire umwete wo kurinda umutima wawe, we kwibagirwa ibyo amaso yawe yiboneye, bye kuva mu mutima wawe iminsi yose ukiriho, ahubwo ubimenyeshe abana bawe n’abuzukuru bawe”. Imana ishimwe. Icyo jye nize muri iri somo nuko aho ruzingiye muri ibi byose ari Ku bintu bitatu.

1. Kurinda Imitima yacu kuva ku Mana.
2. Kutibagirwa ibyo Imana yakoze
3. Kubyigisha abadukomokaho. Mose yari amaze kwibutsa Abisirayeli imirimo ikomeye Imana yabakoreye mu mateka yabo,  abibukije inzira yose banyuzemo n’ibitangaza Imana yabakoreye ngo ibereke ko yubahiriza isezerano yahaye. Mose arangije ati ni irihe shyanga rifite Imana iriri hafi…? Mu buzima bwacu tubonye Imana ikora ibikomeye kangahe? Ni kangahe tumutabaje mu buzima bwacu akatwumva? Ni kangahe twamutakambiye byanze tukabona tuvuye mu bibazo twasubiza amaso inyuma ntitumenye uko twabivuyemo? Ibi ni ibibazo buri wese yakwibaza. Ku bwange, mbona ko Imana ibikorera ko yagambiriye cyera kutubera Imana, kutuba hafi no kuturindira umunezero yatugeneye cyera tutarabaho. Icyo yatuvuzeho cyera igihagararaho kugirango ihore itubereye Imana. 

 

Nkuko Mose yabibwiye Abisirayeli, iyo tugize umugisha wo kubibona mu bugingo bwacu,

1. Tuba dusabwa kubizirikana kugirango Imana yacu ihore koko ari Imana yacu tudatezuka 
2. Ku ruhande rwacu gukora ibishoboka ngo tugendere mu byo Imana yacu ishaka, tuyumvira, twitondera amategeko yayo
3. kuyishima ubudasiba uko twibutse iyo mirimo kandi ibi bituremera izindi mbaraga rikomeye mu kwizera kwacu. Gushima binezeza Imana bigatuma igambirira gukomeza kutugirira neza.
4. Iyo tumaze kwemeranya n’Imana yacu ndetse n’Imitima yacu ko Imana yacu ariyo Mana nya Mana, gukomera kwayo kugahora mu mitima yacu, bituremera ibyiringiro bikomeye kuri  gakondo yacu mw’ijuru ku Mana kandi nkuko Pawulo avuga, kuri abo bizera batyo, ” Imana ntikorwa n’isoni kwitwa Imana yabo..Abaheb 11:16.
5. Uwizeye atyo, Imana ikamubona ityo , ntagumana ibyo byiringiro wenyine. Abyigisha abamukomokaho, atuma urukundo Imana imukunda ruryohera abana, nabo bakifuza kugira gakondo y’umubyeyi. Abo nibo bitwa abana b’isezerano. Imana idufashe kugirango tuyinyure benedata, kugeza aho gukiranuka kwacu kubonekera mu bana bacu imbere y’Imana. Ndumva nifuza kubigeraza nawe ubigambirire. 

 

Abana bacu bashobora no kutabibona nkuko tubireba muri ibi bihe ariko nubundi uru ni uruhare rw’umubyeyi.

Mureke twigishe Abana bacu iby’agakiza. Tubabwire imirimo ikomeye Imana yakoze mu bugingo bwacu, tubigishe iby’isezerano ridakuka kandi tubabere urugero rwiza mu byo dukora kugirango nabo bakure banezeza Imana. Ndizera ntashidikanya, ko Imana itwigishije aya magambo izabidusohoreza. Imana ibahe umugisha. Bishop Gahima.

 

 

[4/24, 7:19 AM]

 

Yesu ashimwe cyane benedata, Imana inejeje Umutima wange pe ndayishimye nukuri. “Hejuru y’abami ndetse n’abatware, hejuru y’abakomeye, hejuru y’Ibizima n’Abamarayika, hariho Imana ikomeye. Icyubahiro cyose n’igitinyiro cyose ni ibyayo iteka. Iri joro Imana yanyigishije Ku gukomera kwayo mu bihe bitandukanye, ndebye ingero muri Bibiliya mbyumva cyane. Nongeye kuyishimira. Muze kugerageza musome gitabo cya Daniyeli igice cya 10. 

 

Daniyeli yari amaze kwerekwa ibizaba, afata igihe cyo gusenga cy’ibyimweru 3 asengera ubugingo bwe n’ubw’Abisirayeli, maze Imana ishaka kumukomeza, imwereka ubwiza bwayo. Dan 10:4-7,      “Ariko Ku munsi wa makumyabiri n’ine w’ukwezi kwa mbere, nari ku nkombe y’uruzi runini rwitwa Hidekelu. Nuko ntereye amaso, mbona umugabo wambaye umwenda w’igitare, yari akenyeje izahabu yacukuwe Ufazi. Kandi umubiri we wasaga na Yasipi, mu maso he hasaga n’umurabyo, amaso ye yasaga n’amatabaza yaka umuriro, amaboko ye  n’ibirenge bye byasaga n’imiringa isenwe kandi ijwi ry’amagambo ye ryari rimeze nk’iryabantu benshi”. Daniyeli ngo abonye ubwo bwiza bw’Imana yararabye, acika intege, ubwiza bwe bumuhindukiramo ububore kuko yari abonye gukomera kw’isumbabyose. Ku murongo wa 18, “uwasaga n’umuntu arongera ankoraho, arankomeza. Arambwira ati, ‘yewe mugabo ukundwa cyane, witinya, amahoro abe muri wowe. Komera, koko komera”. Tukivugana, mperako ndakomezwa, ndavuga nti , Databuja vuga kuko unkomeje”. Igisubizo cya Daniyeli cy’ibyumweru yamaze asenga cyashubirijwe aho abonye gukomera kw’Imana. Uwera yamweretse intambara agiye kurwana, amwereka ko nta wundi bayirwanana usibye Marayika Mikayeli. Nukuri wowe wumvishije Imana ikubwira iti tuza urugamba ni urwange, wakomeza guhangayika koko?

 

Benedata, mu kwizera kwange, ni kenshi mpura n’ibibazo bikomeye, ariko buri gihe kunesha kwange nkubonera mu kubona gukomera kw’Imana. Si uko ibibazo biba birangiye oya, ariko iyo umutima kwange uhamirijwe ko hari Imana isumba byose kandi ishobora byose nkagira uwo mugisha wo kureba imbaraga zayo kuri iyo ncuro, mbona ko ibyo bibazo bifite ubifiteho ubushobozi bwose nkaturiza muri uwo mwami. Kandi koko bivaho mbireba. 

 

Muri Matayo 17:1-7, Yesu yari amaze kubwira Petero ko azamwubakaho itorero rye, yari kandi amaze kumubwira na bagenzi be ko Inzira y’umusaraba itoroshye ahubwo ko ari ukuwikorera, amaze kubabwira ati ushaka kurengera  ubugingo azabubura n’ibindi, yabonye ko Petero na bagenzi be batentebutse. Gukomeza Petero, Yesu yabajyanye mu mpinga y’umusozi maze isura ye irahindurwa, bamubona mu bwiza bwe arabagirana. Petero na Yohana Yakobo babona Yesu mu bundi buryo barakomezwa, Petero  ati, “Mwami, nibyiza ubwo turi hano”. Kandi mbere, ubwo Yesu yavugaga ati “ni ukwikorera umusaraba mukankurikira”, yari yabwiye Yesu ati ” biragatsindwa Mwami”. 

 

Nshuti bavandimwe, ndabasengera ngo namwe mubone gukomera kw’Imana muri ibi bihe. Umuririmbyi ati “njya ninginga Imana ngo ikwereke Yesu…” Uko niko Yobu yarebye gukomera kw’Imana arangije ati “ibyawe nari narabyumvishije amatwi none amaso yange arakureba (Yob 42:5). Imana Data wa twese ibasange ibereke gukomera kwayo kugirango ibaremere Indi page mu kwizera kwanyu kandi ibahe imbaraga. Urugamba ni urwayo, kandi ni intwari itavogerwa. Imana ibahe umugisha. Bishop Gahima.

 

 

 

[4/25, 4:06 AM]

 

Yesu ashimwe mwese benedata, Uyu munsi mbageneye isengesho gusa riri muri Zaburi 20. 

 

Imana ibahe umunsi w’amahoro n’umunezero.

 

 

[4/27, 4:34 AM]

 

Benedata bakundwa, Nongeye kubasuhuza mw’Izina rya Yesu. Iki gitondo ndababwira amagambo y’ubuhanuzi kandi magufi. Mbonye abantu b’Imana barwana urugamba rukomeye rwo gukiranuka ariko Satani arwana inkundura ngo ayobye benshi. Gusa ijambo ryambwiye ngo duhumure kuko “urufatiro rukomeye rw’Imana ruracyahagaze kandi rwanditseho ikimenyetso ngo Uwiteka azi abe” (2Tim 2:19).

 

Ndabasaba ngo twisuzume uko tugenda, ibyo dukora, ibidutwara umwanya, abo tubana nabo, ibyo tuganira…. Twisuzume, aho tubona bidakwiye, uyu munsi tubwire Imana ngo idushyire ahakwiriye kandi idukoreshe iby’ubutwari. Twe guterwa ubwoba n’uburwayi buriho ahubwo  twirinde bishoboka, dusenge Imana yacu kuko abenshi bafite umwanya uhagije noneho. Kandi tuzirikanane kuko Imana iraduhumurije. Koko nange ndabihamya ko Urufatiro rw’Imana rugihagaze kandi Imana iba yatweretse ibyo iba igambiriye kuturwanirira nituyitumbira. Imana ibakomeze kandi ibashyigikire. Bishop Gahima.

 

 

[4/27, 1:12 PM]

 

Yesu ashimwe benedata, nasomye ibitekerezo bitandukanye, ndagirango mbabwire uko mbibona. 

 

Kubwange, nta kibazo mbona cy’abavandimwe batanga ubutumwa kuri uru rubuga. Si amateraniro yo Ku cyumweru ngo hateguwe umuvugabutumwa umwe. Kandi nukuri Bishop siwe uvugana n’Imana wenyine. Rwose abantu bajye bagaragaza amarangamutima yabo mu mwuka Wera  kuko Imana nicyo ishaka. Paulo ati, “ahubwo muhugurane  iminsi yose bikitwa uyu munsi hatagira uwo muri mwe unangirwa umutima n’ibihendo by’ibyaha, kuko twahindutse abafatanije Kristo niba dukomeza rwose ibyiringiro byacu twatangiranye ngo bikomere kugeza Ku mperuka.” Abaheb 3:13 -14. Rwose n’ijambo navuze, abantu kugira icyo barivugaho nta kibazo mbibonamo. Jye ntacyo binkomeretsaho, bipfa kuba bigira abo bifasha. Ibyo gutanga iminsi nzajya ntangaho ubutumwa nabyo sibyo. Nimbishobora nzajya mbutanga ariko n’abandi Imana yafashije rwose ni uburenganzira bwabo.  Ubutumwa buryoha buturutse mu bavugabutumwa banyuranye. Imana ikomeze kuduhishurira igikwiye.

 

 

[4/30, 3:57 AM]

 

Mwaramutse benedata bakundwa, nkuko nababwiye ko ari byiza ko twese abafashijwe tujya dufashanya dusangira ibyiza Imana yaduhaye, nongeye kugaruka ku rubuga uyu munsi mbasangiza ibyo Umwami wacu amfashishije muri iki gitondo.

 

Ejo abantu benshi biriwe bategereje umwanzuro ufatwa kuri gahunda turimo ya guma murugo ariko twarinze tujya kuruhuka tutarabimenya. Nibajije byinshi kubyo tujya twibaza nk’abantu. Ese bwo bavuze bati ubuzima busubiye nkuko byari bisanzwe, ikibazo cyaba gikemutse? Abantu bongeye guterana, kujya ku mirimo ya buri munsi etc, ibibazo byose byaba birangiye? Jye siko mbibona. Isi  yakongera ikaba nkuko bisanzwe. Hari kimwe Imana idushakaho muri ibi bihe, ibibazo byakemuka ubu cyangwa bitakemuka ubu. Imana irashaka ko tureka ibyo duhugiyemo, tukayitumbira, tukayizera, ikatubera Imana natwe tukayibera ubwoko. *1Petero* *5:6-7* “Nuko mwicishe bugufi muri munsi y’ukuboko gukomeye kw’Imana, kugira ngo ibashyire hejuru mu gihe gikwiriye.  Muyikoreze amaganya yanyu yose kuko yita kuri mwe.” 

 

1. Kuri twe, kuba munsi y’ukuboko gukomeye kw’Imana nicyo gisubizo yaba mu byo twita ibihe byiza, cyangwa ibikomeye. Imana ishobora byose niyo ifite ubushobozi bwo guca inzira ahakomeye. Mu bihe nk’ibi, niwe wenyine ufite ububasha butavogerwa. Muri 2Ngoma 7:14, haravuga ngo, “maze abantu bange bitiriwe izina ryange, nibicisha bugufi bagasenga, bagashaka mu maso hange,bagahindukira bakareka ingeso zabo mbi, nange nzumva ndi mw’ijuru….mbakirize igihugu” Nukuri kwicisha bugufi munsi y’ukuboko gukomeye kw’Imana yacu birabuze mu bantu. Duhugiye muri byinshi bitureba kandi uyu ni umurimo w’Imana si uwacu. Yesu yaratubwiye ati, “mubanze mushake ubwami bw’Imana no gukiranuka kwayo nibwo ibindi byose muzabyongererwa”     (Mat 6:33). 

 

2. Iyo Imana itwishimiye, iduha Ku byayo twasezeranijwe, ikadusumbisha ibibazo, ikadusumbisha imbaraga izo arizo zose ziturwanya.  Iki nicyo Petero  yita kudushyira hejuru. Daniyeli na bagenzi be  bubashye Imana aba ariyo yonyine babona ko ikomeye batitaye Ku gukomera kw’abami b’abanyamahanga, Imana nayo ibasumbisha byose. Umuriro ugurumana wari nk’umuyaga uhuha kuri bo, Daniyeli nawe intare zimutinyira uwari umurindiye mu rwobo rwazo. 

 

Nshuti benedata, uwo twizeye arakomeye nukuri. Ashobora byose. Niwe uzi ikidukwiriye ubu. Twarasenze kandi turacyanasenga ntituzatuza. Twizeye ko hari ikiza gukorwa kandi vuba. Gusa twe kuruhande rwacu, ntiducike intege, ntidutezuke, ntudushakishe impamvu z’ibiriho. Bizarangira kandi ibihe biri imbere bizatubera byiza kuruta ibyo twarimo. Imana ibakomeze kandi Ubuntu n’amahoro bitangwa n’Imana data bibane namwe mwese. Bishop Gahima.

 

[4/30, 12:56 PM]

 

Yesu ashimwe benedata, nabonye mwagize impaka nyinshi ku gutanga tugatanga raporo. Dore icyo jye mbivugaho. Abashingira ku gice cyo muri Bibiliya muri Mat 6:2 “ahubwo nugira Ubuntu ntukavuze ihembe.. nkuko indyarya zibigenza mu masinagogi..” Ni byiza ko tubanza tukamenya uko byakorwaga, n’icyatumye Yesu abihanangiriza kudakora batyo. Mu muco w’abafarisayo, bemeraga ko umuntu yitwa umukiranutsi kubera imirimo akora. Kuri bo, gutanga cyari igokorwa cy’icyubahiro kigaragaza umukiranutsi, bityo bagira neza bakabyirata ndetse abagakabya kandi umutima ntaho uhuriye no gukiranuka. Ibyo abapasitori bakora ndibaza ko atariwo mutima babikorana. Icya kabiri, mwese twarabibasabye ko mu bihe nk’ibi, ufite yafasha udafite, ndibaza ko nk’umuryango umwe, gusangira amakuru atari ikibazo. Kandi nanone, ibitangwa si ibya Pasitori. N’abakristo bigomwe ku byabo bakeneye kumenya ko ibyo batanze koko byagiye aho bikwiye kujya mu mucyo. 

Icya gatatu, jye numva uru rubuga ari urw’umuryango. Turishishanya iki? Ahubwo jye numva aho kunengana, twakunganiranye.

 

Icyanyuma, Pawulo ati, “kandi tujye tuzirikana ubwacu kugirango duterane ishyaka ryo gukundana n’iry’imirimo myiza” (Abaheb 10:24).  Ubu se bene data, iri shyaka Pawulo avuga rigaragarira he muri twe? Jye mbona ahubwo twabaye dushima abakora batyo kuko bagoboka abantu b’Imana kandi kubimenyekanisha ku rubuga batagamije kwiyamamaza ahubwo ari uguterana ishyaka ngo n’abandi tugenze dutyo.

 

 

[5/2, 5:24 AM]

 

Mwaramutse nshuti benedata, Nukuri umutima wange uranezerewe muri iki gitondo. Maze iminsi mbandikira amagambo Imana impa avuga ku gukiranukira Imana no kuyikorera gukwiriye, biracyakomeza kuko imirimo Imana yaduteguriye cyera nubundi ni iyo gukiranuka kandi dusabwa kuyigenderamo ibihe byose. Gusa Uyu munsi irampumurije pe, namwe reka mbasangizezeho. 

 

Yoweli 3: 1-5. “Hanyuma y’ibyo, nzasuka Umwuka wange ku bantu bose, abahungu banyu n’abakobwa banyu bazahanura, abakambwe banyu bazerekwa, ndetse n’abagaragu banjye n’abaja banjye, nzabasukira ku Mwuka wanjye muri iyo minsi. Nzashyira amahano mw’Ijuru no mw’Isi: amaraso n’umuriro n’umwotsi ucumba. Izuba rizahinduka umwijima, n’ukwezi kuzahinduka amaraso,  uwo munsi mukuru w’Uwiteka uteye ubwoba utaraza. Kandi umuntu wese uzambaza izina ry’Uwiteka azakizwa, kuko i Siyoni n’i Yerusalemu hazaba abarokotse, nkuko Uwiteka yabivuze kandi mu barokotse hazabamo abo Uwiteka ahamagara”. 

 

Yesu ashimwe cyane. Ejo nyuma yo kumva ko insengero zigifunzwe, numvise ncitse intege nukuri, nibaza byinshi gusa nkomezwa nuko nibura abantu babonye uko bagera aho bashakishiriza ibibatunga, mbishimira Imana. Iki gitondo Imana inyerekeye mu nzozi no muri aya magambo n’ayo mu gice cyayabanjirije ko ahubwo muri twe, hagiye kubaho ibihe bidasanzwe byo gusubizwa kw’itorero. Muri Yoweli 2:23-27, harasobanura ukuntu Imana igiye kudusubiza umunezero udasanzwe, ikadusubiza ibyo inzige zariye, ikadusubiza abacu satani yari yaraboshye, amazina murayareba, ikadusendereza n’ibigega by’umugisha. Nyuma y’aho hazaba ivugabutumwa budasanzwe, Imana izihagurukiriza abavugabutumwa benshi kandi bakomeye kandi abazumva ubutumwa ntibazaburambirwa ahubwo inzara n’inyota byo kumva ijambo ry’Imana bifatanije n’imbaraga n’ubushizi bw’amanga bw’abavugabutumwa, bizazana ububyutse bushya kandi ntawe uzashobora kuzimya uyu muriro. Imana yacu ishimwe cyane. Numvishije nshubijwemo imbaraga cyane, icyampa ngo nawe bikugereho. Nukuri dushobora guca mu bikomeye yego ariko uwihangana azanesha. Icyo Imana idushakaho ni: Ukwihana, guharanira kuyinezeza dukora ibyo gukiranuka, gusoma ijambo ryayo no gusenga ubudasiba kugirango duhore  turi maso, ahasigaye dutegereze ibyo idusezeranije. Imana ibahe umunezero usesekaye, ibuzuze imbaraga z’Umwuka wera kandi ibahe Umugisha. Bishop Gahima.

 

[5/4, 4:09 AM]

https://youtu.be/Fo4-RvvsJ9M

 

[5/4, 5:12 AM]

 

Mwaramutse nshuti z’Imana, ngirango ubu nibwo butumwa busoza ubwo maze iminsi mbandikira muri ibi bihe twari murugo twese kubera gahunda ya “Guma mu rugo”. Nubwo tukirwana urugamba rwa Covid-19, mwizere rwose mudashidikanya ko intsinzi ari iy’Imana kandi Itorero rirarwaniriwe cyane. Imana yacu ihore ihimbazwa iteka. 

 

Iyi minsi ishize yose nagiye mpishurirwa uko dukwiye kwitwara imbere iy’Imana yacu nkabibabwira, nubu niko bikimeze kuko dukwiye guhora duhagaze imbere iy’Imana yacu dutitira kuko ni Imana ikiranuka kandi Yera kandi twe tudakiranuka na rimwe usibye imbabazi zayo. 

 

Iki gitondo numvise gushima Imana cyane ndetse no kwifuza kuzirikana ijambo impaye ndetse n’ejo hashize, riduteguza ibihe tugiye kwinjiramo. *Guteg* 8 :1-2           “Amategeko yose mbategeka uyu munsi  mujye muyitondera muyumvire, kugirango mubeho  mugwire, mujye mu gihugu uwiteka yarahiye basekuruza banyu ko azabaha, mugihindure. Kandi ujye wibuka urugendo rwose rwo mu butayu Uwiteka Imana yawe yakuyoboyemo iyi myaka uko ari mirongo ine, kugirango igucishe bugufi, ikugerageze imenye ibyo mu mutima wawe, yuko wakwitondera amategeko yayo cyangwa utayitondera”. 

 

Nshuti benedata, iyi mirongo ni micye ariko ivuze byinshi kandi Imana imaze iminsi iduhumuriza, itwereka ko ibihe turimo bitazatinda, ko ndetse nyuma yabyo hazaba imbaraga nshya n’ububyutse bukomeye bw’Itorero. Dushobora  kuba tutabireba nk’abantu ariko ni umugambi w’Imana kandi uzasohozwa byanze bikunze. Ahubwo se twe tugiye kubyitwaramo dute?

 

Icyo Imana idushakaho ntakindi nukuri. Ni ukuyumvira, ni ukumenya icyo idushakaho akaba aricyo imitima yacu ihugiramo, ni uguhora tuzirikana uko yaturinze kandi ikiturinze muri ibi bihe bikomeye no kureba uko ukuboko kwayo  kwadukingiye ubwo abakomeye, badafite icyo babuze batwarwaga n’iki cyorezo ndetse n’ibindi binanije benshi, twe tugakomeza kurindwa. Nyamuneka ntituzibagirwe.

 

“Uzirinde we kwibwira uti, ‘imbaraga zange n’amaboko yange nibyo byampesheje ubu butunzi ahubwo uzibuke Uwiteka Imana yawe kuko ariyo iguha imbaraga zikuronkesha butunzi kugirango ikomeze isezerano yasezeranije indahiro na ba sekuruza banyu nkuko irikomeza muri iki gihe”. (8: 17-18). Reka ibi bihe tunyuzemo bitubere isomo rikomeye Ku rukundo Imana idukunda kandi tumenye ko icyo yagambiriye cyera muri twe ikakidusezeranira, ari iyo kwizerwa kandi itatureka idasohoje indahiro yayo yadusezeraniye. Si kubw’imbaraga zacu cyangwa ubwenge bwacu  kuba tugejeje iki gihe ntacyo turaba cyangwa mu gihugu cyacu ntawe uratwarwa n’ubu burwayi. Nuko hari icyo Imana yatugambiriyeho.  Imana y’i Gahini ifite byinshi idutegurira byiza yaturindiye kwakira. Mureke twitegure, dutegure imitima yacu, tuyicururire Umwami wacu ahasigaye dutegereze ibyo yadusezeraniye. Imana ikomeze kubaha ihishurwa rikwiye. Amahoro n’umugisha bitangwa n’Imana Data bibane na mwe iteka ryose. Bishop Gahima.

 

 

[5/10, 5:18 AM]

 

Mwaramutse benedata, dusangire n’aya magambo anyubatse cyane muri iki gitondo. 

 

Yesaya 42:6-13.             “Jyewe Uwiteka naguhamagariye gukiranuka, nzagufata ukuboko, nzakurinda nguhe kuba isezerano ry’abantu no kuba umucyo uvira abanyamahanga, no guhumura impumyi, ukabohora imbohe, ugakura ababa mu mwijima mu nzu y’imbohe. Ndi Uwiteka  ni ryo zina ryange, icyubahiro cyange sinzagiha undi, n’ishimwe ryange sinzariha ibishushanyo bibajwe. Dore ibya mbere birasohoye, n’ibishya ndabibamenyesha mbibabwire bitari byaba”….. Ku murongo wa 13, ” Uwiteka azatabara ari intwari, arwane ishyaka nk’intwari mu ntambara, azivuga arangurure ijwi, ababisha be azabakoreraho ibikomeye”. 

Iri jambo riratubwira ibyo twahawe nk’abaragwa b’ibyasezeranijwe, kandi nukuri ibyo Imana yacu yageneye umwana wayo ikunda cyane Yesu, natwe nibyo twahawe (Rom 8). Icyakabiri nkuko imirongo isoza ibivuga, Uwiteka ahora yiteguye kuturwanirira ngo arinde kandi arengere ibyo yaduhaye. Nimubyakire rero mushima,  kandi muzirikana urwo rukundo. Imana iduhane icyumweru cyiza cy’amahoro n’umugisha. Bishop Gahima.

 

 

[5/19, 3:00 AM]

 

Yesu ashimwe nshuti benedata, iki gitondo Pawulo atubwiye amagambo y’ukuri.” Nuko rero, uwibwira ko ahagaze, yirinde atagwa. Nta kigeragezo kibasha kubageraho kitari rusange mu bantu, kandi Imana niyo yo kwizerwa kuko itazabakundira kugeragezwa ibiruta ibyo mushobora, ahubwo hamwe n’ibibagerageza izabacira akanzu kugirango mubone uko mubasha kubyihanganira”. 1Abakorinto 10:12-13.

 

Mwebwe abahangayitse, abababaye, abarwana intambara z’uburyo butandukanye, mwibuke ko Yesu yadutangiye icyiru kiruta ibindi. Nicyo tutajyaga gushobora gusa gutanga. Ibindi, Imana ibitunyuzamo mu buryo bwayo kandi nukuri urukundo idukunda rutuma itatureka ngo ibigeragezo bitugeze aho tudashobora kunesha. Muhumure iyo twizeye nubu iracyari ku ntebe y’ubushobozi. Ibi bihe bizashira kandi nibinakomeza, ifite uko izabiducishamo mu buryo bwayo. Imana ibakomereze mu bintu bwayo.

 

 

[5/24, 4:11 AM]

 

Mwaramutse nshuti z’Imana, Yesu ashimwe cyane, sinari mperutse kuzindukana ubutumwa kandi nubu ntabwo ngiye kohereza kuko uyu munsi turasangira n’abizera bose, byumwihariko Abangilikani bose, ubutumwa kuri TV ya Isango Star. Uyu munsi gusa nifuje kubibutsa gukomeza umurego mwari mufite mu gusangira ijambo ry’Imana. Iryo shyaka ndabona rigabanuka. 

Pawulo yabwiye Timoteyo ati, “ubwirize abantu ijambo ry’Imana, ugire umwete mu gihe kigukwiriye no mu kitagukwiriye, uhane, uteshe, uhugure, ufite kwihangana kose no kwigisha”. 2Tim 4:2-4. Ibi biradukwiye cyane cyane muri ibi bihe turimo kuko nicyo twaherewe impano y’Umwuka Wera. Imana ibahe umunsi mwiza.

 

 

 

 

[5/24, 11:34 AM]

 

 

Ndabashimiye mwese nshuti nziza. Ndizera ko Imana yahesheje irina ryayo icyubahiro ndetse na Diyosezi yacu.

 

[5/24, 1:23 PM]

 

https://youtu.be/SHAPa1cOzhc

 

 

[5/29, 4:19 AM]

 

Mwaramutse benedata, Yesu ashimwe cyane!!  “Umunsi wa Pentekoti usohoye,bose bari bari hamwe, mu mwanya umwe, bahuje umutima. Nuko umuriro ubatungura uvuye mw’ijuru umeze nk’umuyaga uhuha cyane, ukwira inzu bari bicayemo, haboneka indimi zigabanije zisa n’umuriro, ururimi rujya ku muntu wese wo muri bo”. Ibyak 2: 1-3.

 

Nshuti bene data, kuri iki  cyumweru tuzaba twizihiza Pentekoti, ni ibihe by’umugisha ku bubaha Imana bose kuko Umwuka Wera niyo impano Kristo yaduhaye kutuyobora no kuturwanirira ndetse no kuturanga muri ibi bihe tutamurebesha amaso yacu, ahubwo atubereye umutambyi kandi utuvuganira ku Mana Data. Ndabasaba ngo tugerageze dutegura imitima yacu kugirango iyi impano rwose ibe mu mitima yacu kandi idushoboze gukora imirimo y’ubutwari nkuko abatubanjirije bakoraga kandi birashoboka. Gusa kubigeraho, buradusaba ubuntu 3.

1. *Kuba* *umwe* *no* , *guhuza* *umutima* Kugirango tube umwe, turasabwa kumenya abo turibo, kumenya ko duhuje kwizera, uko kwizera kukaduha imbaraga zo gukomeza gushakashaka ibituma Imana yacu itwishimira aribyo kwanga icyaha n’igisa n’icyaha ndetse no kuzirikana kwiyeza ibihe byose, kugirango ubugingo bwacu butegurwe rwose, ibihe byo guhembutwa bisange twiteguye. Petero ati”nuko mwihane muhindukire, ibyaha yanyu bihanagurwe ngo iminsi yo guhemburwa ibone uko iza ituruka ku Mwami Mana, itume Yesu ariwe Kristo wabatoranirijwe kera, uwo ijuru rikwiye kwakira kugeza igihe ibintu byose bizongera gutunganirizwa..” Guhuza umutima bihera ku kugira umutima nya Mutima, wuzuye ubwiru bw’Imana,  noneho tugahuza imitima yacu mu mwami wacu.
2. *Kongera* *ibihe* *byo* *gusenga*: Ku b’icyo gihe, kuba hamwe iwabo, babanaga basenga, bibutsa Yesu ko mu bihe barimo ariwe ufite ubushobozi bwo bubashoboza. Ikindi bumvaga azagaruka vuba bikabagarurira ibyiringiro. Nshuti mbabwire ko twe atari ko turi ubu, twagiriwe ubuntu ko ibyo twasezeranijwe byabonetse. Umwuka Wera twaramuhawe, twasogongeye imbaraga ze, icyo dusabwa gusa ni ukwisohokamo, tukareka Umwuka Wera akatubera umugenga w’ubuzima bwacu, akatuyobora. Mureke tugerageze kongera ibihe byo gusenga, dusaba kwezwa, gutungana no kwambikwa imbaraga.
3. *Kwatura* *ibyo* *twizera* bikamenywa  na bose. Ijambo riratubwiye ngo buri wese yabonye umugabane ku mbaraga, atangira kuvuga ibya Yesu mu rurimi rutari urwe. Ntbagumye aho, batangiye kwamamaza ubutumwa bwiza, ndabasaba ngo rwose tugerageze kwatura ibyo twizeye ku bantu bose, ubuhamya bw’ibyo Imana yadukoreye bwubaka abameze nkatwe kandi na Yesu yarabivuze ko nidutinya kumwamamaza, nawe ntazatwamamaza imbere ya Data. 

Mureke rero duhuze umutima, tube imbere y’Imana yacu, twihane Tureke ibyaha, duhabwe imbaraga hanyuma nitumara gukomezwa, duhaguruke twamamaze ubutumwa bwiza, bizanezeza Imana yacu nayo izadukorera ibikomeye. Imana ibahe umugisha. Bishop Gahima.

 

 

[5/31, 6:53 AM]

 

Nshuti benedata mwese, mfashe uyu mwanya ngo mbifurije Pentekoti nziza. Imana ibuzuze rwose, muhabwe imbaraga, muhabwe ubwenge, muhabwe ubushizi bw’amanga mu guhamya imirimo y’Uwiteka ndetse no kurwanya Satani. Mushobozwe rwose mw’Izina rya Yesu. Uyu munsi utubere urwibutso rw’urukundo ruhebuje Yesu yadukunze aduha umufasha w’ibihe byose. Umwuka Wera adukomeza mu makuba, aturwanirira mu ntambara, atwibutsa ubudasiba urukundo Imana idukunda kugirango kwizera kwacu kudatezuka, kandi aturinda gukora icyaha.  “Abayoborwa n’Umwuka w’Imana bose nibo bana b’Imana, kuko mutahawe umwuka w’ububata ubasubiza mu bwoba ahubwo mwahawe Umwuka ubahindura abana b’Imana”. Abaroma 8: 14-15.

 

 

[6/5, 4:52 AM]

 

Yesu ashimwe nshuti z’Imana. Iki gitondo tugiriwe umugisha wo kwigisha n’Imana ibiriho. Ndifuza ko dufatanya nawe ubyifuza guhagarara mu nshingano. Tumaze iminsi dusengera gutabarwa mu bihe turimo ariko noneho, Imana  irashaka ko duhagarara mu birindiro tugahangana n’imbaraga z’umwijima.

 

“Kuko tudakirana n’abafite amaraso n’umubiri, ahubwo dukirana n’abatware n’abafite ubushobozi n’abategeka iyi si y’umwijima, n’imyuka mibi y’ahantu ho mu ijuru. Nuko rero mutware intwaro zose z’Imana kugirango mubashe gukomera ku munsi mubi kandi murangije byose, mubashe guhagarara mudatsinzwe”. Abef 6:12-13. Nshuti benedata, nongere mbibutse ko ibihe byacu by’umunezero, amahoro, iterambere etc bitajya binezeza Satani. Dukwiye kujya tuzirikana ko muri ibyo bihe, tugomba gufata umwanya tukabirindisha amasengesho. Abanyamasengesho ibi barabyumva cyane, hari ibihe dusenga dusaba, ibihe dusenga twiyeza ariko hari n’ibihe dusenga amasengesho y’intambara, tugasenya ibihome bya Satani. 

 

Ibihe turimo ntibyoroshye, nubwo icyorezo gihagaritse byinshi ariko na Satani ntatuje. Aracyakomeza kuzana n’ibindi ngo yisasire benshi, abuze amahoro abayafite ku mpamvu zifatika n’izidafatika. Igikuraho izi mbaraga z’umwijima ntakindi, ni amasengesho y’urugamba. Dore icyo bisaba:

 *1* . *Kwiyeza* : mu byakozwe n’Intumwa 3: 19,  ” nuko mwihane muhindukire, ibyaha byanyu bihanagurwe, ngo iminsi yo guhemburwa ibone uko iza ituruka ku Mwami Mana”. Aha niho imbaraga zacu zubakirwa. Nukuri dukeneye ko Imana itwishimira, ikaduha imbaraga nyazo kuko twe ubwacu ntacyo twakwishoborera. Imana nitwishimira, izaduha ubushobozi bwo kunesha, nituvuga mw’izina risumba ayandi, bizaba nkuko tubitegetse, nidusenya imbaraga z’umwijima ziteza ibibi byose, bizakurwaho.

2. *Gusenga* *ubudasiba* : Mu bihe nk’ibi, igisenya ibihome bya Satani ni nugusenga nukuri. Mu bihe bya ba Daniyeli (Dan 6:1-29), Umwami Dariyo, ku nama mbi yagiriwe n’ abatware be yatanze itegeko ko abantu bose bamusenga mu minsi 30, abantu bose  barabyubahiriza, ariko Daniyeli ngo yakomeje gusenga Imana ye nkuko yari asanzwe abikora. Nubwo Umwami yamukundaga, yamuhanishije igihano cyari cyarateguriwe abatazubahiriza ririya tegeko. Yajugunywe mu rwobo rw’ intare ariko kubera ukuboko kw’Imana kwari kumwe nawe, intare zananiwe kumurya, atari uko zidashonje, cyangwa ko azihumurira nabi ahubwo kuko Imana yizeye yarushaga imbaraga izo ntare. Nshuti z’Imana, Iyo twizeye si iyo gukerenswa, ishobora byose kandi uko tuyiha icyubahiro, nayo niko yigaragaza hejuru y’imbaraga z’umwijima.
3. *Kuzura* *urukundo*. Urukundo nirwo rutuma duhuze umutima. Yesu ati, “ariko igihe kiraje ndetse kirasohoye ubwo abasenga byukuri basengera Data mu mwuka no mu kuri kuko Data ashaka ko bene abo aribo bamusenga” Yoh 4:23. Abakundanye bahuza umutima kandi bene abo bahuza n’umwuka. Urugamba rurwanywa n’abahuje umutima. Satani burya abiba amacakubiri kugirango asenye imbaraga. Mureke iri banga turimenye, Satani ntazatunesha, Igihugu cyacu kizakomeza kuba mu mahoro, aho satani yigaragaza muzabona agenda ahava buhoro intsinzi y’abana b’Imana iboneke. Imana ibahe guhagarara mudatsinzwe, kandi ibambike intwaro zose z’Imana- Abef 6: 14-18. Mugire umunsi mwiza w’umugisha. Bishop Gahima.

 

 

[6/13, 4:25 AM]

 

Yesu ashimwe nshuti z’Imana, iki gitondo nifuje ko dusangire aya magambo inshuti y’Imana Dawidi yavuze. ” *Uwiteka* *ahimbazwe* , *Kuko* *yanyerekeye* *imbabazi* *ze* *zitangaza* , *Mu* *mudugudu* *ufite* *igihome* *gikomeye* “.

Zaburi 31:22.

Aya magambo, hamwe n’andi nasomye, aramfamfashije. Bitumye nshima Imana cyane kubw’aho yadushyize, ari naho iduhishe. Umuririmbyi Aimee Uwimana yararirimbye ati, “hahirwa ubwoko bugufite nk’Imana yabwo, hahirwa umuntu wese witiriwe izina rye(ry’Imana)”.  Abakijijwe turahirwa, kuko twabonye igihome duhungiramo. Uwiteka atubereye ubwugamo atubereye amahoro, aturisha intambara  ibihe byinshi twe tuba tubona byarangiye twananiwe, akihesha icyubahiro mu bugingo bwacu. Ndashima uwo mwami ko arinze itorero rye muri ibi bihe bikomeye arinze ubugingo bwacu ndetse n’umuryango yacu.

 

Muri aya magambo, Dawidi we yumvaga umutekano n’uburinzi mu rukundo rw’Imana akumva ni nkaho  Uwiteka afite aho yamuhishe arindiwe (umidugudu). Pawulo nawe yabonaga ubuntu bw’Imana nkaho ari igihome uwizera arindirwamo ubwo yandikiraga Timoteo ati  ” nuko rero mwana wange, ukomerere mu buntu bubonerwa muri Kristo Yesu..”2 Tim 2:1. Nshuti z’Imana, ubwo buntu, icyo gihome, ayo mahoro, urwo rukundo bibabere umudugudu mwihishamo muri iki gihe kandi muri uwo mudugudu, Uwiteka ahabahere ibyo kurya by’Umwuka bikomeza kubagira bashya uko bukeye nuko bwije. Imana ikomeze kubagirira neza mw’Izina rikomeye rya Yesu. Bishop Gahima.

COVID-19 | 2021